తెలంగాణ రాష్ట్ర ప్రభుత్వం ప్రవేశపెట్టిన 2026-27 వార్షిక బడ్జెట్లో మహిళా సంక్షేమానికి అత్యంత ప్రాధాన్యత లభించింది. రాష్ట్రంలోని కోటి మంది మహిళలను కోటీశ్వరులను చేయాలనే లక్ష్యంతో రూపొందించిన ‘మహిళా శక్తి మిషన్’లో భాగంగా డ్వాక్రా సంఘాలకు వడ్డీ లేని రుణాల కోసం రూ. 2500 కోట్లు కేటాయించారు. ఈ నిధులు గ్రామీణ మరియు పట్టణ ప్రాంతాల్లోని స్వయం సహాయక సంఘాల మహిళలు తమ వ్యాపారాలను వృద్ధి చేసుకోవడానికి మరియు స్వయం ఉపాధి మార్గాలను మెరుగుపరుచుకోవడానికి వెన్నుదన్నుగా నిలవనున్నాయి.
మహిళా సంఘాలను కేవలం రుణాలకే పరిమితం చేయకుండా, వారిని వ్యాపార భాగస్వాములుగా మార్చేందుకు ప్రభుత్వం వినూత్న చర్యలు చేపట్టింది. ఇందులో భాగంగా మహిళా సంఘాల ద్వారా 600 బస్సులను కొనుగోలు చేసి ఆర్టీసీకి అద్దెకు ఇవ్వాలని నిర్ణయించింది. ఇప్పటికే నారాయణపేట, సంగారెడ్డి జిల్లాల్లో మహిళా సంఘాల ఆధ్వర్యంలో పెట్రోల్ బంకులు విజయవంతంగా నడుస్తుండగా, మరో 28 బంకులను వారికి అప్పగించే ప్రక్రియ పురోగతిలో ఉంది. అలాగే వారు తయారు చేసే ఉత్పత్తులకు మార్కెటింగ్ సౌకర్యం కల్పిస్తూ శిల్పారామంలో ప్రత్యేక స్టాళ్లను కూడా ఏర్పాటు చేశారు.
మహిళా సాధికారతను మరింత బలోపేతం చేసేందుకు ప్రభుత్వం డ్వాక్రా సంఘాల్లో చేరే వయోపరిమితిని 18 ఏళ్ల నుంచి 61 ఏళ్లకు సవరించింది. రాష్ట్రవ్యాప్తంగా 22 జిల్లాల్లో ‘ఇందిరా మహిళా శక్తి భవనాల’ నిర్మాణం చేపడుతుండటంతో పాటు, మహిళా పారిశ్రామికవేత్తల కోసం ప్రత్యేక శిక్షణా కార్యక్రమాలను నిర్వహిస్తోంది. రాబోయే ఐదేళ్లలో బ్యాంకుల ద్వారా లక్ష కోట్ల రుణాలను మహిళా సంఘాలకు అందించాలని లక్ష్యంగా పెట్టుకోవడం మహిళా ఆర్థిక స్వావలంబన దిశగా ఒక కీలక అడుగుగా నిపుణులు అభివర్ణిస్తున్నారు.
