శర్వానంద్ హీరోగా, రామ్ అబ్బరాజు దర్శకత్వంలో రూపొందిన ఫ్యామిలీ ఎంటర్టైనర్ ‘నారీ నారీ నడుమ మురారి’ జనవరి 14న ప్రేక్షకుల ముందుకు రాబోతోంది. ఈ సినిమా ప్రమోషన్లలో భాగంగా నిర్వహించిన ఈవెంట్లో సీనియర్ నటుడు నరేష్ అత్యంత ఆత్మవిశ్వాసంతో మాట్లాడారు. ఈ సినిమా తన కెరీర్లో ‘వెర్షన్ 3.0’ లాంటిదని, థియేటర్లో అడుగుపెట్టిన దగ్గర నుంచి టైటిల్స్ పడే వరకు ప్రేక్షకులు నవ్వుతూనే ఉంటారని ధీమా వ్యక్తం చేశారు. ఒకవేళ ఎవరైనా నవ్వకపోతే తన ఇంటికి వచ్చి అడగవచ్చని, తన అడ్రస్ అందరికీ తెలుసు కదా అంటూ ఆయన చేసిన ‘ఓపెన్ ఛాలెంజ్’ ఇప్పుడు సోషల్ మీడియాలో హాట్ టాపిక్గా మారింది.
గతంలో ‘సామజవరగమన’ సినిమాతో భారీ విజయాన్ని అందుకున్న నరేష్, అదే తరహా వినోదం ఈ చిత్రంలో కూడా ఉంటుందని స్పష్టం చేశారు. “సామజవరగమన హిట్ అవుతుందని ముందే చెప్పాను, ఇప్పుడు ఈ సినిమాపై కూడా నాకు గన్ షాట్ నమ్మకం ఉంది” అని ఆయన పేర్కొన్నారు. ఈ చిత్రంలో తనది ‘ది బెస్ట్ రోల్’ అని, సంక్రాంతి సీజన్కు ఇది పక్కా ఫన్ ఫెస్టివల్ అని నరేష్ వివరించారు. ఈ సినిమాలో సంయుక్త మీనన్, సాక్షి వైద్య హీరోయిన్లుగా నటించగా, విశాల్ చంద్రశేఖర్ సంగీతం అందించారు. శర్వానంద్ సరసన నరేష్ పండించే కామెడీ టైమింగ్ సినిమాకు ప్రధాన ఆకర్షణగా నిలవనుందని చిత్ర బృందం చెబుతోంది.
నరేష్ చేసిన ఈ వ్యాఖ్యలు సినిమాపై అంచనాలను అమాంతం పెంచేశాయి. ముఖ్యంగా ‘నా అడ్రస్ తెలుసు కదా’ అని ఆయన అనడం, గతంలో దర్శకుడు మారుతి చేసిన వ్యాఖ్యలను గుర్తు చేస్తోందని నెటిజన్లు చర్చించుకుంటున్నారు. ఏదేమైనా, సంక్రాంతి పండుగ పూట కుటుంబ సమేతంగా థియేటర్కు వచ్చే ప్రేక్షకులకు కావాల్సిన వినోదాన్ని ఈ సినిమా పుష్కలంగా అందిస్తుందని సినీ వర్గాలు విశ్లేషిస్తున్నాయి. శ్రీవిష్ణు స్పెషల్ క్యామియో కూడా ఉండటంతో ‘నారీ నారీ నడుమ మురారి’ బాక్సాఫీస్ వద్ద ఏ మేరకు మ్యాజిక్ చేస్తుందో చూడాలి.
