స్టాక్ మార్కెట్ పెట్టుబడులు, ట్రేడింగ్ చిట్కాల పేరుతో సైబర్ నేరగాళ్లు రెచ్చిపోతున్నారు. తాజాగా ఒక మాజీ ఐపీఎస్ అధికారి భార్యను లక్ష్యంగా చేసుకుని ఏకంగా రూ.2.58 కోట్ల మేర దోచుకున్నారు. బాధితురాలి భర్త గతంలో కేంద్ర దర్యాప్తు సంస్థ (CBI వంటి సంస్థలు)లో కీలక బాధ్యతలు నిర్వర్తించిన వ్యక్తి కావడం గమనార్హం. కేవలం వాట్సాప్ సందేశాలతో మొదలైన ఈ మోసం, బాధితులను నిలువునా ముంచేసింది.
సైబర్ నేరగాళ్లు తొలుత ఆమెకు వాట్సాప్లో ట్రేడింగ్ చిట్కాల గురించి సందేశం పంపారు. స్టాక్ మార్కెట్పై తగిన అవగాహన లేకపోవడంతో ఆమె తన భర్త నంబర్ను సదరు గ్రూప్లో చేర్పించారు. తాము సూచించిన స్టాక్స్ లో పెట్టుబడి పెడితే 500 శాతం లాభాలు వస్తాయని, ఇది సెబీ (SEBI) గుర్తింపు పొందిన వెబ్సైట్ అని నమ్మించడానికి నిందితులు నకిలీ సర్టిఫికెట్లను పంపారు. వారి మాయమాటలు నమ్మి, బాధితురాలు డిసెంబర్ 24 నుంచి ఈ నెల 5వ తేదీ వరకు మొత్తం 19 లావాదేవీల ద్వారా రూ.2.58 కోట్లు బదిలీ చేశారు.
పెట్టుబడి పెట్టిన తర్వాత లాభాలు రాకపోగా, అదనంగా డబ్బు కట్టకపోతే అసలు కూడా రాదని నిందితులు బెదిరించడంతో ఆమె మోసపోయానని గ్రహించారు. వెంటనే సైబర్ క్రైమ్ పోలీసులను ఆశ్రయించి ఫిర్యాదు చేశారు. రంగంలోకి దిగిన పోలీసులు కేసు నమోదు చేసి దర్యాప్తు చేపట్టారు. సోషల్ మీడియాలో వచ్చే అపరిచిత లింకులు, అధిక లాభాలు వస్తాయనే ఆశ చూపే యాప్స్ పట్ల అప్రమత్తంగా ఉండాలని పోలీసులు ఈ సందర్భంగా హెచ్చరిస్తున్నారు.
