అంబేద్కర్ కోనసీమ జిల్లాలోని ద్రాక్షారామ భీమేశ్వర స్వామి ఆలయ సమీపంలో గుర్తు తెలియని దుండగులు బరితెగించారు. స్థానిక కోనేటిలో ఉన్న శివలింగాన్ని దుండగులు ధ్వంసం చేయడం తీవ్ర సంచలనంగా మారింది. మంగళవారం ఈ విషయం వెలుగులోకి రావడంతో స్థానికులు, భక్తులు దిగ్భ్రాంతికి గురయ్యారు. పవిత్ర పుణ్యక్షేత్రంలో ఇలాంటి అపచారం జరగడంతో హిందూ సంఘాలు తీవ్ర ఆగ్రహం వ్యక్తం చేస్తున్నాయి.
పోలీసుల దర్యాప్తు వేగవంతం:
-
ఎస్పీ పర్యవేక్షణ: ఘటన జరిగిన వెంటనే జిల్లా ఎస్పీ రాహుల్ మీనా ద్రాక్షారామానికి చేరుకుని క్షేత్రస్థాయిలో పరిశీలించారు. డాగ్ స్క్వాడ్ను రంగంలోకి దించి ఆధారాలు సేకరించారు.
-
ప్రత్యేక బృందాల ఏర్పాటు: నిందితులను పట్టుకునేందుకు నాలుగు ప్రత్యేక పోలీసు బృందాలను ఏర్పాటు చేసినట్లు ఎస్పీ ప్రకటించారు.
-
సీసీటీవీ ఫుటేజ్: ఆలయ పరిసరాల్లో ఉన్న సీసీ కెమెరాల ఫుటేజీని పోలీసులు నిశితంగా పరిశీలిస్తున్నారు. దుండగులు ఎవరు? ఏ సమయంలో ఈ పని చేశారనే దానిపై ఆరా తీస్తున్నారు.
ప్రజల ఆగ్రహం:
శివలింగం ధ్వంసం వార్త తెలియగానే హిందూ సంఘాల ప్రతినిధులు భారీగా తరలివచ్చి ఆలయ పరిసరాల్లో ఆందోళన చేపట్టారు. నిందితులను వెంటనే అరెస్ట్ చేసి కఠినంగా శిక్షించాలని నినాదాలు చేశారు. పుణ్యక్షేత్రాల వద్ద భద్రతను మరింత పెంచాలని వారు డిమాండ్ చేస్తున్నారు. ప్రస్తుతం పోలీసులు ద్రాక్షారామంలో ఎలాంటి ఉద్రిక్తతలు చోటుచేసుకోకుండా భారీ బందోబస్తు ఏర్పాటు చేశారు.
