మొంథా తుఫాన్ గాయాల నుండి కోలుకుంటూ.. ఇటీవల సంభవించిన ‘మొంథా’ తుఫాన్ రాష్ట్రవ్యాప్తంగా సుమారు ఆరు లక్షల ఎకరాల్లో పంట నష్టాన్ని మిగిల్చింది. ముఖ్యంగా వరి, పత్తి, మొక్కజొన్న రైతులు పెట్టుబడి కూడా దక్కక విలవిల్లాడారు. ఆ నష్టం నుండి తేరుకుంటూనే, రైతులు మళ్లీ నాగలి పట్టారు. సూర్యుడు అస్తమించినా తిరిగి ఉదయించినట్లుగా, ప్రకృతి వైపరీత్యాలు ఎన్ని ఎదురైనా భూమినే నమ్ముకుని రైతన్న మళ్లీ విత్తనాలు వేసేందుకు సిద్ధమయ్యాడు. రాష్ట్రవ్యాప్తంగా ఇప్పటికే 8 లక్షల ఎకరాలకు పైగా సాగు పనులు ప్రారంభమయ్యాయి.
మెరుగుపడిన భూగర్భ జలమట్టం ఈ ఏడాది సాధారణం కంటే 39 శాతం అధిక వర్షపాతం నమోదు కావడంతో సాగుకు కావాల్సిన నీటి లభ్యత ఆశాజనకంగా ఉంది. రాష్ట్రంలోని దాదాపు 29 జిల్లాల్లో అధిక వర్షపాతం కురవడంతో బావులు, చెరువులు, ప్రాజెక్టులు నీటితో కళకళలాడుతున్నాయి. గత ఏడాది సగటు భూగర్భ జలమట్టం 6.05 మీటర్లు ఉండగా, ఈసారి అది 4.41 మీటర్ల స్థాయికి పెరిగింది. రిజర్వాయర్లలో ప్రస్తుతం 840 టీఎంసీల నీటి నిల్వ ఉండటం యాసంగి సాగుకు కొండంత అండగా నిలుస్తోంది.
ప్రభుత్వం ముందున్న సవాళ్లు యాసంగిలో వరి 51 లక్షల ఎకరాల్లో, మొక్కజొన్న 6.5 లక్షల ఎకరాల్లో సాగవుతుందని అంచనా. అయితే, సాగు ప్రారంభంలోనే నకిలీ విత్తనాలు, కల్తీ ఎరువుల ముప్పు పొంచి ఉంది. వానాకాలం సీజన్లో ఎదురైన యూరియా కొరత ఈసారి తలెత్తకుండా ప్రభుత్వం ముందస్తు చర్యలు చేపట్టాలి. అలాగే, పంట చేతికొచ్చే సమయంలో కురిసే వడగండ్ల వానల నుండి రైతులను కాపాడేందుకు బీమా సౌకర్యం, దళారీల దోపిడీ లేకుండా గిట్టుబాటు ధర కల్పించడంపై యంత్రాంగం దృష్టి సారించాల్సిన అవసరం ఉంది.
