రాష్ట్ర ప్రభుత్వం డ్రగ్స్ నిర్మూలన విషయంలో కేవలం పండుగలు, కొత్త సంవత్సరం వేడుకల సమయంలోనే హడావుడి చేస్తోందని కేంద్ర మంత్రి బండి సంజయ్ విమర్శించారు. శనివారం ‘ఎక్స్’ (ట్విట్టర్) వేదికగా ఆయన స్పందిస్తూ.. 2017లో సంచలనం సృష్టించిన డ్రగ్స్ కేసు దర్యాప్తును అప్పటి ప్రభుత్వం ఏ విధంగా నీరుగార్చిందో వివరిస్తూ పలు ప్రశ్నలు సంధించారు. అప్పట్లో సిట్ అధికారిగా ఉన్న అకున్ సబర్వాల్ సేకరించిన కీలక ఆధారాలు ఏమయ్యాయని ఆయన నిలదీశారు.
బండి సంజయ్ లేవనెత్తిన ప్రధానాంశాలు:
-
అధారాల మాయం: 2017 డ్రగ్స్ కేసులో అనేకమంది సినీ ప్రముఖులు, రాజకీయ నేతల పేర్లు బయటకు వచ్చాయని, దానికి సంబంధించిన ఆడియో, వీడియో ఆధారాలను నాటి సీఎస్ సోమేశ్ కుమార్ స్వాధీనం చేసుకున్నారని బండి సంజయ్ ఆరోపించారు. ఆ ఆధారాలను కోర్టు ముందు ఎందుకు ఉంచలేదని ప్రశ్నించారు.
-
కేసీఆర్ కుటుంబంపై ఆరోపణలు: విచారణలో కేసీఆర్ కుటుంబ సభ్యుల పేర్లు కూడా వినిపించాయన్న భయంతోనే, నాటి ముఖ్యమంత్రి అకున్ సబర్వాల్ను హఠాత్తుగా బదిలీ చేసి కేసును పక్కదారి పట్టించారని విమర్శించారు.
-
సోమేశ్ కుమార్ను విచారించాలి: నాటి సీఎస్ సోమేశ్ కుమార్ను అదుపులోకి తీసుకుని విచారిస్తేనే డ్రగ్స్ కేసు వెనుక ఉన్న అసలు నిజాలు, మాయమైన ఆధారాల గుట్టు బయటపడుతుందని డిమాండ్ చేశారు.
సమర్థులైన అధికారుల అవసరం
డ్రగ్స్ మహమ్మారిని తెలంగాణ నుంచి పూర్తిగా తరిమికొట్టాలంటే అకున్ సబర్వాల్ వంటి నిబద్ధత కలిగిన అధికారులకు బాధ్యతలు అప్పగించాలని బండి సంజయ్ సూచించారు. ప్రస్తుత కాంగ్రెస్ ప్రభుత్వం కూడా కేవలం ప్రకటనలకే పరిమితమవుతోందని, ‘జీరో డ్రగ్స్’ విధానం క్షేత్రస్థాయిలో అమలు కావడం లేదని ఎద్దేవా చేశారు. కొంతమంది అధికారులు లంచాలకు ఆశపడి డ్రగ్స్ మాఫియాతో చేతులు కలిపారని తమ వద్ద సమాచారం ఉందని, దీనిపై పారదర్శకమైన దర్యాప్తు జరగాలని ఆయన స్పష్టం చేశారు.
