బాలీవుడ్ నటి కరిష్మా కపూర్ దివంగత భర్త సంజయ్ కపూర్‌కు చెందిన ₹30 వేల కోట్ల ఆస్తి వివాదం మరోసారి తెరపైకి వచ్చింది. ఈ ఆస్తిలో వాటా కోరుతూ సంజయ్ పిల్లలు సమైరా మరియు కియాన్‌లు ఢిల్లీ హైకోర్టును ఆశ్రయించారు. ఈ కేసు విచారణలో భాగంగా, తన పిల్లల చదువుకు సంబంధించిన ఫీజులను గత రెండు నెలలుగా చెల్లించడం లేదంటూ పిల్లల సవతి తల్లి ప్రియా సచ్‌దేవ్‌పై ఆరోపణలు వచ్చినట్లు పిల్లల తరఫు న్యాయవాది మహేశ్ జఠ్మలాని కోర్టు దృష్టికి తీసుకొచ్చారు. ఆస్తులన్నీ ప్రస్తుతం ప్రియా సచ్‌దేవ్ నియంత్రణలో ఉన్నాయని, అమెరికాలో చదువుతున్న సమైరాకు రెండు నెలలుగా ఫీజులు చెల్లించలేదని ఆయన వాదించారు.
అయితే, ప్రియా సచ్‌దేవ్ తరఫు న్యాయవాది రాజీవ్ నాయర్ ఈ ఆరోపణలను తీవ్రంగా ఖండించారు. ఈ ఆరోపణలన్నీ కల్పితాలని, ఫీజులు ఇప్పటికే చెల్లించామని ఆయన తెలిపారు. కేవలం మీడియా దృష్టిని ఆకర్షించేందుకే ఈ ‘చిన్న సమస్యను’ లేవనెత్తారని ఆయన వాదించారు. ఇరుపక్షాల వాదనలు విన్న జస్టిస్ జ్యోతి సింగ్ తీవ్ర అసహనం వ్యక్తం చేశారు. కేసు విచారణను మెలోడ్రామాగా మార్చవద్దని గట్టిగా హెచ్చరించారు. ఇలాంటి చిన్నపాటి సమస్యలను కోర్టు బయటే సామరస్యంగా పరిష్కరించుకోవాలని న్యాయమూర్తి ఇరువర్గాలకు సూచించారు.
2003లో వివాహం చేసుకున్న కరిష్మా మరియు సంజయ్ కపూర్‌లు 2016లో విడాకులు తీసుకున్నారు. సంజయ్ మరణానంతరం ఆయన ఆస్తుల కోసం ఈ వివాదం మొదలైంది. తమ సవతి తల్లి ప్రియా సచ్‌దేవ్ నకిలీ వీలునామా సృష్టించిందని పిల్లలు ఆరోపిస్తున్నారు. ఈ ప్రధాన ఆస్తి వివాదంపై విచారణ ఇంకా కొనసాగుతోంది.
