తెలంగాణ రాష్ట్ర యువతలో ఆత్మవిశ్వాసాన్ని నింపుతూ, దేశ సేవలో భాగమయ్యేందుకు కలలుకనే వేలాది మంది యువకులకు ఆశాకిరణంగా అగ్నివీర్ రిక్రూట్మెంట్ ర్యాలీ హన్మకొండలో ఘనంగా ప్రారంభమైంది. హన్మకొండ జిల్లా కలెక్టర్ స్నేహ శబరీష్ జెండా ఊపి ఈ ర్యాలీని లాంఛనంగా ప్రారంభించారు. ఆర్మీ చెన్నై జోన్, సికింద్రాబాద్ రిక్రూట్మెంట్ ఆఫీసు సమన్వయంతో నిర్వహిస్తున్న ఈ ర్యాలీ నవంబర్ 22 వరకు కొనసాగనుంది. తెలంగాణలోని 33 జిల్లాల నుంచి సుమారు ఎనిమిది వేల మంది యువకులు ఈ నియామక ప్రక్రియలో పాల్గొననున్నారు.
ప్రతి రోజు ఉదయం నాలుగు గంటలకే ఫిజికల్ టెస్టులు ప్రారంభమవుతాయి. రన్నింగ్, లాంగ్ జంప్, చెస్ట్ మేజర్మెంట్, జిగ్జాగ్ రన్, చిన్అప్స్ వంటి ఫిజికల్ ఫిట్నెస్ పరీక్షలతో పాటు మెడికల్ టెస్టులు కూడా నిర్వహిస్తున్నారు. మొత్తం రిక్రూట్మెంట్ కాలంలో దాదాపు 7956 మంది యువకులు వైద్య పరీక్షలకు హాజరుకానున్నారు. పరీక్షలకు ముందు అభ్యర్థుల సర్టిఫికెట్లను పూర్తిగా పరిశీలించి, అర్హులైన వారినే మైదానంలోకి అనుమతిస్తున్నారు. ఈ ప్రక్రియ మొత్తాన్ని పారదర్శకంగా, కట్టుదిట్టమైన భద్రతా చర్యల మధ్య నిర్వహిస్తున్నట్లు అధికారులు స్పష్టం చేశారు.
అగ్నివీర్ నియామక ప్రక్రియలో ఎటువంటి మోసాలకు తావులేకుండా అధికారులు కఠిన హెచ్చరికలు జారీ చేశారు. ఉద్యోగం ఇప్పిస్తామని ఎవరైనా చెబితే నమ్మవద్దని, అలాంటి మోసపూరిత చర్యలు గమనిస్తే వెంటనే డయల్ 100 ద్వారా పోలీసులకు సమాచారం ఇవ్వాలని యువతకు సూచించారు. రిక్రూట్మెంట్ ప్రాంగణంలో దాదాపు 200 మంది పోలీసులు విధులు నిర్వహిస్తున్నారు. ఈ ర్యాలీ ద్వారా వేలాది మంది తెలంగాణ యువతకు ఆర్మీలో సేవ చేసే గొప్ప అవకాశం లభించనుండటం రాష్ట్రానికి గర్వకారణంగా నిలుస్తోంది.
