ప్రముఖ నటుడు, తెలుగు ప్రేక్షకులు హాస్యబ్రహ్మగా పిలుచుకునే బ్రహ్మానందం శనివారం తెలంగాణ ముఖ్యమంత్రి కె.చంద్రశేఖర్ రావును కలిశారు. భార్య లక్ష్మి, పెద్ద కుమారుడు రాజా గౌతమ్తో కలిసి శనివారం సాయంత్రం ప్రగతి భవన్కు వెళ్లిన బ్రహ్మానందం.. త్వరలో జరగనున్న తన చిన్న కుమారుడు సిద్ధార్థ్ పెళ్లికి సీఎం కేసీఆర్ను ఆహ్వానించారు. బ్రహ్మానందం-లక్ష్మి దంపతులు వివాహ పత్రికను కేసీఆర్-శోభ దంపతులకు అందజేశారు. తన కుమారుడు పెళ్లి హైదరాబాద్లోనే జరుగుతుందని.. తప్పకుండా హాజరుకావాలని కేసీఆర్ను బ్రహ్మానందం కోరారు. ఈ సందర్భంగా బ్రహ్మానందం దంపతులకు సీఎం కేసీఆర్ శుభాకాంక్షలు తెలిపారు.
బ్రహ్మానందం పెద్దకుమారుడు గౌతమ్.. హీరోగా తెలుగు ప్రేక్షకులకు సుపరిచితమే. ఆయన కూడా ప్రస్తుతం సినిమాలు చేయడం మానేశారు. ఇక రెండో కుమారుడు సిద్ధార్థ్ గురించి పెద్దగా ఎవరికీ తెలీదు. ఆయన మొదటి నుంచీ సినిమాలకు దూరంగా ఉన్నారు. విదేశాల్లో చదువుకున్న ఆయన.. అమెరికాలో ఉద్యోగం చేస్తున్నారు. ఈ ఏడాది మే నెలలో సిద్ధార్థ్ నిశ్చితార్థం జరిగింది. ఈ నిశ్చితార్థం ద్వారానే చాలా మందికి బ్రహ్మానందం చిన్న కుమారుడు గురించి తెలిసింది.
