పశ్చిమాసియాలో అమెరికా-ఇజ్రాయెల్ మరియు ఇరాన్ మధ్య కొనసాగుతున్న యుద్ధంపై కేంద్ర ప్రభుత్వం రాజ్యసభలో కీలక ప్రకటన చేసింది. గత పది రోజులుగా సాగుతున్న ఈ దాడుల వల్ల గల్ఫ్ దేశాల్లో ఉద్రిక్త పరిస్థితులు నెలకొన్నాయని, దీనిపై ప్రధాని నరేంద్ర మోదీ ఎప్పటికప్పుడు సమీక్ష జరుపుతున్నారని విదేశాంగ మంత్రి ఎస్. జైశంకర్ వెల్లడించారు. గల్ఫ్ దేశాల్లో ఉపాధి పొందుతున్న లక్షలాది మంది భారతీయుల భద్రతే తమ ప్రభుత్వానికి మొదటి ప్రాధాన్యతని, వారిని సురక్షితంగా స్వదేశానికి తీసుకొచ్చేందుకు ప్రత్యేక విమానాల ద్వారా అన్ని ప్రయత్నాలు చేస్తున్నామని ఆయన స్పష్టం చేశారు.
ఈ యుద్ధం భారత వ్యూహాత్మక మరియు ఆర్థిక ప్రయోజనాలపై తీవ్ర ప్రభావం చూపుతుందని జైశంకర్ ఆందోళన వ్యక్తం చేశారు. మన దేశ ఇంధన భద్రతకు గల్ఫ్ దేశాలు అత్యంత కీలకమని, అక్కడి నుండే మనకు కావాల్సిన చమురు మరియు గ్యాస్ సరఫరా అవుతుందని గుర్తు చేశారు. ఉద్రిక్తతలు పెరగడం వల్ల చమురు ధరలు పెరిగే అవకాశం ఉందని, దీనిని దౌత్యపరంగా ఎదుర్కోవడానికి భారత ప్రభుత్వం సిద్ధంగా ఉందని తెలిపారు. చర్చలు మరియు దౌత్య మార్గాల ద్వారానే ఈ సంక్షోభానికి పరిష్కారం దొరుకుతుందని భారత్ పదే పదే ప్రపంచ దేశాలకు విజ్ఞప్తి చేస్తోంది.
ఇదే సమయంలో మానవతా దృక్పథంతో ఇరాన్ యుద్ధ నౌకకు భారత్ ఆశ్రయం కల్పించిన విషయాన్ని కూడా మంత్రి ప్రస్తావించారు. విశాఖపట్నంలో జరిగిన మిలాన్-2026 వేడుకల అనంతరం తిరిగి వెళ్తుండగా సాంకేతిక సమస్య తలెత్తిన ఇరాన్ నౌక ‘ఐరిస్ లావన్’కు కొచ్చి పోర్టులో డాకింగ్ అనుమతి ఇచ్చినట్లు తెలిపారు. అంతర్జాతీయంగా ఎన్ని ఇబ్బందులు ఉన్నప్పటికీ, కష్టకాలంలో సహాయం కోరిన దేశానికి అండగా నిలిచామని, దీనిపై ఇరాన్ ప్రభుత్వం భారత్కు కృతజ్ఞతలు తెలిపిందని జైశంకర్ పేర్కొన్నారు.
