విశాఖపట్నంలోని జగదాంబ సెంటర్లో ఒక యువతిపై గుర్తుతెలియని వ్యక్తి దాడి చేసిన ఘటనలో పోలీసులు నిందితుడిని అదుపులోకి తీసుకున్నారు. ఆఫీసుకు వెళ్తున్న సమయంలో థియేటర్ వద్ద ఉన్న ‘రాజాసాబ్’ సినిమా పోస్టర్ను ఫోటో తీస్తుండగా, నిందితుడు ఆమెపై విరుచుకుపడి చెంపపై కొట్టడమే కాకుండా అసభ్య పదజాలంతో దూషించాడు. బాధితురాలు ఈ విషయాన్ని సోషల్ మీడియాలో పంచుకోవడంతో పాటు పోలీసులకు ఫిర్యాదు చేయడంతో ఈ ఉదంతం వెలుగులోకి వచ్చింది.
యువతి ఫిర్యాదుపై తక్షణమే స్పందించిన విశాఖ పోలీసులు నిందితుడిని పట్టుకుని విచారించగా, అతనికి మానసిక పరిస్థితి సరిగా లేదని ప్రాథమికంగా తేలింది. నిందితుడు పోలీస్ స్టేషన్లో యువతికి క్షమాపణలు చెప్పగా, అతని పరిస్థితిని గమనించిన బాధితురాలు మానవీయ దృక్పథంతో స్పందించింది. అతనిపై చట్టపరమైన చర్యలు తీసుకోవద్దని, బదులుగా మానసిక ఆసుపత్రిలో చేర్పించాలని పోలీసులను కోరినట్లు సమాచారం. దీంతో ఈ కేసు ఒక సానుకూల ముగింపునకు చేరుకుంది.
ఈ ఘటనపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు స్పందిస్తూ విశాఖ పోలీసుల పనితీరును అభినందించారు. విశాఖపట్నం బ్రాండ్ ఇమేజ్ను దెబ్బతీసేలా అసత్య ప్రచారాలు చేసే వారిపై కఠినంగా వ్యవహరించాలని, మహిళల భద్రత విషయంలో రాజీ పడకూడదని అధికారులను ఆదేశించారు. శాంతిభద్రతల పరిరక్షణలో ఏపీ పోలీసులు ప్రజల భద్రతకు కట్టుబడి ఉన్నారని సీఎం ఈ సందర్భంగా గుర్తు చేశారు.
