అమెరికా అధ్యక్షుడు డొనాల్డ్ ట్రంప్ ఆదేశాలతో వెనిజులా అధ్యక్షుడు నికోలస్ మదురోను అమెరికా దళాలు అదుపులోకి తీసుకున్న ఘటనను ప్రస్తావిస్తూ మహారాష్ట్ర మాజీ ముఖ్యమంత్రి పృథ్వీరాజ్ చవాన్ సంచలన వ్యాఖ్యలు చేశారు. భారత్లో కూడా ఇలాంటి పరిస్థితి తలెత్తవచ్చా అని ప్రశ్నిస్తూ, “వెనిజులాలో జరిగిన అలాంటి ఘటన భారతదేశంలో కూడా జరుగుతుందా? మిస్టర్ ట్రంప్ మన ప్రధానమంత్రిని కిడ్నాప్ చేస్తారా?” అని వ్యాఖ్యానించారు. అమెరికా విధించిన భారీ సుంకాలు (Tariffs) భారత వాణిజ్యాన్ని దెబ్బతీస్తున్నాయని విమర్శించే క్రమంలో ఆయన ఈ పోలికను ఉపయోగించారు.
చవాన్ వ్యాఖ్యలపై భారతీయ జనతా పార్టీ (BJP) తీవ్రంగా మండిపడింది. ఇది కాంగ్రెస్ పార్టీ యొక్క “భారత వ్యతిరేక మనస్తత్వాన్ని” ప్రతిబింబిస్తోందని బీజేపీ జాతీయ ప్రతినిధి ప్రదీప్ భండారీ విమర్శించారు. ఒక సార్వభౌమ దేశ ప్రధానిని వెనిజులా అధ్యక్షుడితో పోల్చడం దేశాన్ని అవమానించడమేనని మండిపడ్డారు. జమ్మూ కాశ్మీర్ మాజీ డీజీపీ ఎస్పీ వైద్ కూడా ఈ వ్యాఖ్యలను తప్పుబడుతూ, ఇది దేశ ప్రతిష్టను దిగజార్చేలా ఉందని ఆవేదన వ్యక్తం చేశారు.
అమెరికా సుంకాల వల్ల భారతీయ వ్యాపారులకు కలిగే నష్టం గురించి చవాన్ ఆందోళన వ్యక్తం చేశారు. 50 శాతం సుంకంతో ఎగుమతులు చేయడం అసాధ్యమని, ఇది ప్రత్యక్షంగా వాణిజ్యాన్ని అడ్డుకోవడమేనని ఆయన వాదించారు. గతంలో అమెరికాకు ఎగుమతుల ద్వారా భారత్ పొందిన లాభాలు ఇకపై లభించవని, మనం ప్రత్యామ్నాయ మార్కెట్ల కోసం వెతకాల్సిన అవసరం ఉందని ఆయన సూచించారు. అయితే, ఇదే సమయంలో వెనిజులా ఉదాహరణను ప్రధానికి అన్వయించడం మాత్రం పెద్ద ఎత్తున విమర్శలకు దారితీసింది.
