సాధారణంగా ఏటీఎంలలో డబ్బులు డ్రా చేసినప్పుడు పొరపాటున నకిలీ నోట్లు వస్తే బ్యాంకు అధికారులకు ఫిర్యాదు చేయాలని పోలీసులు సూచిస్తుంటారు. అయితే, తమిళనాడులోని తిరుపూర్ జిల్లాలో మాత్రం ఒక వ్యక్తి ఏకంగా కలర్ జిరాక్స్ మెషీన్తో నకిలీ నోట్లు తయారు చేసి ఏటీఎం మెషీన్ ద్వారానే బ్యాంకుకు పంపి పోలీసులకు చిక్కాడు. తిరుపూర్ మంగళం రోడ్డులోని ఐసీఐసీఐ బ్యాంక్ ఏటీఎం సెంటర్లో అధికారులు నగదు తనిఖీ చేయగా, అందులో 12 ఐదు వందల రూపాయల నకిలీ నోట్లు బయటపడ్డాయి. దీనిపై బ్యాంకు మేనేజర్ ఫిర్యాదు చేయడంతో రంగంలోకి దిగిన పోలీసులు సీసీటీవీ దృశ్యాల ఆధారంగా విచారణ ప్రారంభించారు.
ఈ దర్యాప్తులో మురుగంపాలయంలో కిరాణా దుకాణం నడుపుతున్న రాజేంద్రన్ (45) అసలు నిందితుడని తేలింది. రాజేంద్రన్ కిరాణా వ్యాపారంతో పాటు వడ్డీ వ్యాపారం, ఇతర రాష్ట్రాల కార్మికులకు నగదు బదిలీ చేసే పనులు కూడా చేస్తుండేవాడు. తన దుకాణంలోని కలర్ జిరాక్స్ మెషీన్ను ఉపయోగించి ₹500 నోట్లను ముద్రించి, గత మూడు నెలలుగా గుట్టుచప్పుడు కాకుండా చలామణిలోకి తెచ్చాడు. తన వద్దకు వడ్డీకి డబ్బులు తీసుకోవడానికి వచ్చే వారికి, అసలు నోట్ల మధ్యలో ఈ నకిలీ నోట్లను కలిపి ఇచ్చేవాడని పోలీసుల విచారణలో వెల్లడైంది.
భారతదేశంలో కరెన్సీ నోట్లను జిరాక్స్ తీయడం లేదా అచ్చువేయడం ఆర్బీఐ నిబంధనల ప్రకారం తీవ్రమైన నేరం (ఫోర్జరీ). నిందితుడు రాజేంద్రన్ను పోలీసులు అరెస్ట్ చేసి, నకిలీ నోట్ల తయారీకి ఉపయోగించిన జిరాక్స్ మెషీన్ను స్వాధీనం చేసుకున్నారు. చట్టం ప్రకారం ఇలాంటి చర్యలకు పాల్పడితే భారీ జరిమానాతో పాటు సుదీర్ఘ కాలం జైలు శిక్ష విధించే అవకాశం ఉంది. ఏటీఎంలలో డబ్బులు జమ చేసేవారు లేదా డ్రా చేసేవారు జాగ్రత్తగా ఉండాలని, ఏవైనా అనుమానాస్పద నోట్లు కనిపిస్తే వెంటనే అధికారులకు సమాచారం ఇవ్వాలని పోలీసులు హెచ్చరిస్తున్నారు.
