తెలుగు రాష్ట్రాల్లో సంచలనం సృష్టించిన మీర్పేట్ కుక్కర్ హత్య కేసులో తాజాగా ఒక ఊహించని ట్విస్ట్ సోషల్ మీడియాలో చర్చనీయాంశమైంది. మాజీ ఆర్మీ ఉద్యోగి పుట్టా గురుమూర్తి తన భార్య మాధవిని హత్య చేయడానికి ‘మరదలితో అక్రమ సంబంధమే’ కారణమంటూ కొన్ని మీడియా సంస్థలు మరియు సోషల్ మీడియా వేదికల్లో కథనాలు వెలువడ్డాయి. గురుమూర్తి తన మరదలితో ప్రేమాయణం సాగిస్తున్నాడని, ఈ విషయం బయటపెట్టినందుకే భార్యపై కక్ష పెంచుకుని కిరాతకంగా చంపేశాడనే వార్తలు విపరీతంగా వైరల్ అయ్యాయి.
అయితే, ఈ వార్తలను మీర్పేట్ పోలీసులు తీవ్రంగా ఖండించారు. ప్రస్తుతానికి ఈ కేసు కోర్టు విచారణలో (Trial) ఉందని, ఇలాంటి తప్పుడు కథనాలను ప్రచారం చేయడం వల్ల బాధితురాలి కుటుంబ సభ్యులు మరింత మానసిక వేదనకు గురవుతారని పోలీసులు ఆవేదన వ్యక్తం చేశారు. నిందితుడు గురుమూర్తి కేవలం గృహహింస, భార్యభర్తల మధ్య మనస్పర్ధల కారణంగానే ఈ ఘాతుకానికి పాల్పడినట్లు ఇప్పటివరకు జరిగిన విచారణలో తేలిందని, కొత్తగా వస్తున్న ‘ప్రేమాయణం’ వార్తల్లో నిజం లేదని మీర్పేట్ ఎస్హెచ్ఓ (SHO) స్పష్టం చేశారు.
మీడియా మిత్రులకు మరియు నెటిజన్లకు విజ్ఞప్తి చేస్తూ.. ఈ కేసులో బాధ్యతారహితమైన కథనాలను ప్రచురించవద్దని పోలీసులు కోరారు. ఎవరైనా అవాస్తవాలను ప్రసారం లేదా ప్రచురణ చేసినట్లయితే వారిపై చట్టపరమైన చర్యలు తీసుకుంటామని హెచ్చరించారు. ఈ ఏడాది జనవరిలో జరిగిన ఈ హత్యలో, గురుమూర్తి తన భార్యను చంపి ఆధారాలు దొరకకుండా శరీరాన్ని ముక్కలు చేసి కుక్కర్లో ఉడకబెట్టిన సంఘటన సమాజంలో తీరని భయోత్పాతాన్ని సృష్టించిన సంగతి తెలిసిందే.
