సంగారెడ్డి జిల్లా కొల్లూరులో శనివారం ఘోర ప్రమాదం జరిగింది. హైదరాబాద్ పాతబస్తీకి చెందిన ఫాతిమా (20) అనే యువతి తన ప్రియుడు హుస్సేన్ అలీతో కలిసి కొల్లూరులోని తమ డబుల్ బెడ్రూమ్ ఫ్లాట్కు వెళ్లింది. వీరిద్దరూ గదిలో ఏకాంతంగా ఉన్న సమయంలో, ఫాతిమా తండ్రి హఠాత్తుగా అక్కడికి చేరుకుని తలుపు తట్టాడు. తండ్రి గొంతు వినగానే భయాందోళనకు గురైన ఫాతిమా, తాను దొరికిపోతాననే ఆందోళనతో అక్కడి నుంచి తప్పించుకోవాలని భావించింది.
బయట తండ్రి వేచి ఉండటంతో, ఫాతిమా తన ప్రియుడి సహాయంతో బాల్కనీ గుండా పక్క ఫ్లాట్లోకి వెళ్లేందుకు ప్రమాదకరంగా ప్రయత్నించింది. అయితే, 8వ అంతస్తు బాల్కనీ నుంచి పక్కకు వెళ్తున్న క్రమంలో పట్టు తప్పి ఒక్కసారిగా కిందపడిపోయింది. తీవ్ర గాయాలైన యువతి అక్కడికక్కడే ప్రాణాలు కోల్పోయింది. కళ్లముందే కూతురు విగతజీవిగా పడి ఉండటం చూసి తండ్రి మరియు ఇతర కుటుంబ సభ్యులు కన్నీరుమున్నీరుగా విలపిస్తున్నారు.
ఈ ఘటనపై సమాచారం అందుకున్న పోలీసులు సంఘటనా స్థలానికి చేరుకుని వివరాలు సేకరించారు. మృతదేహాన్ని పోస్టుమార్టం నిమిత్తం ఆసుపత్రికి తరలించి, కేసు నమోదు చేసి దర్యాప్తు చేస్తున్నారు. చదువుకుని కెరీర్ను తీర్చిదిద్దుకోవాల్సిన వయసులో ఇలాంటి నిర్ణయాలు తీసుకోవడం, భయంతో ప్రాణాలు పణంగా పెట్టడం వల్ల ఒక నిండు ప్రాణం బలికావడం స్థానికంగా తీవ్ర చర్చకు దారితీసింది.
