సినిమా పైరసీకి పాల్పడిన ‘ఐ బొమ్మ’ రవి (ఎమ్మాది రవి) అరెస్టు తర్వాత కూడా పైరసీ కార్యకలాపాలు ఆగడం లేదు. రవి అరెస్ట్ను అదునుగా తీసుకుని, అతను అనుసరించిన మార్గాన్నే ఎంచుకోవడానికి మరికొందరు సిద్ధమవుతున్నారని పోలీసు ఉన్నతాధికారులు గుర్తించారు. ముఖ్యంగా, ‘ఐ బొమ్మ’ అనే పేరుతో డబ్బు సంపాదించవచ్చని భావించిన కొందరు, పైరసీ సినిమాలను అప్లోడ్ చేసేందుకు ఆన్లైన్లో మార్గాల కోసం పరిశీలిస్తున్నారని పోలీసుల విచారణలో తేలింది.
రవి అనుసరించిన పంథా ఏమిటంటే, అతను ఓటీటీ సర్వర్లను హ్యాక్ చేయకుండా, కేవలం మార్కెట్లో అందుబాటులో ఉన్న పైరసీ సినిమాలను కొనుగోలు చేసి, వాటిని తన డొమైన్లలో అప్లోడ్ చేశాడు. ఇప్పుడు iBomma, Bappam వంటి వెబ్సైట్లను తొలగించిన తర్వాత, మరికొందరు వ్యక్తులు పాత డొమైన్ పేరుకు ఒకటి, రెండు అక్షరాలు మార్చి, వాటినే పోలి ఉండేలాగా కొత్త వెబ్సైట్లను ప్రారంభించే ప్రయత్నాలు చేస్తున్నారు. ఈ విధంగా చాలా సింపుల్గా పైరసీ కార్యకలాపాలను కొనసాగించేందుకు సిద్ధమవుతున్నారు.
ఈ పరిణామాల నేపథ్యంలో, సినిమా పైరసీని నియంత్రించి, సినీ పరిశ్రమకు నష్టం జరగకుండా ఉండేందుకు పోలీసులు చర్యలు చేపట్టారు. సైబర్ పెట్రోలింగ్ను మరింత ముమ్మరం చేసి, ఓటీటీ వేదికలు, థియేటర్లలో కొత్తగా విడుదలైన సినిమాలు, వెబ్ సిరీస్లను రికార్డ్ చేసి సామాజిక మాధ్యమాల్లో పోస్ట్ చేస్తున్న వారిపై నిరంతరం నిఘా ఉంచాలని పోలీసు ఉన్నతాధికారులు ఆదేశాలు జారీ చేశారు. చట్టవిరుద్ధంగా వ్యవహరించే వారిపై కఠిన చర్యలు తీసుకుంటామని పోలీసులు హెచ్చరించారు.
