భారత మహిళా స్టార్ ఓపెనర్ స్మృతి మంధాన, ప్రముఖ సంగీత దర్శకుడు పలాష్ ముచ్చల్‌ల వివాహం చివరి నిమిషంలో వాయిదా పడటానికి కారణమైన స్మృతి తండ్రి శ్రీనివాస్ మంధాన అస్వస్థత నుంచి కోలుకున్నారు. పెళ్లికి కొన్ని గంటల ముందు గుండె సంబంధిత సమస్యలతో ఆసుపత్రిలో చేరిన ఆయనకు ఎటువంటి ప్రమాదం లేదని ఆసుపత్రి వర్గాలు స్పష్టం చేశాయి. వైద్యులు నిర్వహించిన యాంజియోగ్రఫీలో కూడా గుండెకు రక్త ప్రసరణలో ఎలాంటి అడ్డంకులు లేవని తేలింది. అన్ని పరీక్షలు, చికిత్సల అనంతరం శ్రీనివాస్ మంధానను మంగళవారం (నవంబర్ 25, 2025) నాడు ఆసుపత్రి నుంచి డిశ్చార్జ్ చేసి ఇంటికి పంపించారు.
తన తండ్రి ఆరోగ్యం కోలుకోవడమే తనకు ముఖ్యమని, ఆయన పూర్తిగా ఆరోగ్యవంతులైన తర్వాతే పెళ్లి చేసుకుంటానని స్మృతి మంధాన స్పష్టంగా చెప్పినట్లు ఆమె మేనేజర్ తుహిన్ మిశ్రా ధ్రువీకరించారు. అయితే, ఒకవైపు తండ్రి కోలుకోవడం సంతోషాన్నిచ్చినా, మరోవైపు కాబోయే భర్త పలాష్ ముచ్చల్ కూడా వైరల్ ఇన్ఫెక్షన్, ఎసిడిటీ సమస్యలతో స్వల్ప అనారోగ్యానికి గురై చికిత్స తీసుకుని డిశ్చార్జ్ కావడంతో పెళ్లి ఎప్పుడు జరుగుతుందనే దానిపై సందిగ్ధత కొనసాగుతోంది.
ఇప్పటికే స్మృతి తన ఇన్‌స్టాగ్రామ్ ఖాతా నుంచి పెళ్లి వేడుకల ఫొటోలను తొలగించడం అభిమానుల్లో చర్చనీయాంశంగా మారింది. తండ్రి ఆరోగ్యం మెరుగుపడినప్పటికీ, రెండు కుటుంబాలు పెళ్లి కొత్త తేదీపై ఇంకా ఎలాంటి అధికారిక ప్రకటన చేయలేదు.
