భారతదేశం మరియు అమెరికా రక్షణ రంగంలో సహకారాన్ని మరింత బలోపేతం చేయడానికి ఉద్దేశించిన పదేళ్ల ఫ్రేమ్‌వర్క్ ఒప్పందంపై సంతకం చేశాయి. మలేషియాలోని కౌలాలంపూర్‌లో జరిగిన ఆసియాన్ రక్షణ మంత్రుల సమావేశం (ADMM) సందర్భంగా భారత రక్షణ మంత్రి రాజ్‌నాథ్ సింగ్ మరియు అమెరికా రక్షణ కార్యదర్శి పీట్ హెగ్సేత్ ఈ ఒప్పందాన్ని ఖరారు చేశారు. ట్రంప్ ప్రభుత్వం భారత్ వస్తువులపై సుంకాలు విధించిన తర్వాత ఈ ఒప్పందం కుదరడం ప్రాధాన్యత సంతరించుకుంది. ఈ ఒప్పందం ఇరు దేశాల రక్షణ భాగస్వామ్యానికి మార్గనిర్దేశం చేసి, ప్రాంతీయ స్థిరత్వానికి మూలస్తంభంగా నిలుస్తుందని ఇరువురు మంత్రులు పేర్కొన్నారు.
రక్షణ మంత్రి రాజ్‌నాథ్ సింగ్ ఈ ఒప్పందంపై మాట్లాడుతూ, ఇరు దేశాల ద్వైపాక్షిక సంబంధాలలో రక్షణ ప్రధాన అంశంగా ఉంటుందని తెలిపారు. స్వేచ్ఛాయుత, బహిరంగ, నియమాల ఆధారిత ఇండో-పసిఫిక్ ప్రాంతాన్ని నిర్ధారించడానికి ఈ భాగస్వామ్యం చాలా కీలకమని ఆయన స్పష్టం చేశారు. అమెరికా రక్షణ కార్యదర్శి పీట్ హెగ్సేత్ కూడా ఈ ఒప్పందం పట్ల సంతోషం వ్యక్తం చేస్తూ, ఇది తమ రక్షణ భాగస్వామ్యాన్ని ముందుకు తీసుకెళ్తుందని, ఇరు దేశాల మధ్య సమన్వయం, సమాచార భాగస్వామ్యం, సాంకేతిక సహకారాన్ని మరింతగా పెంచుకుంటామని ఎక్స్ (X) వేదికగా పోస్ట్ చేశారు.
ఈ ఒప్పందం పదేళ్ల పాటు కొనసాగనుంది. ఆగ్నేయాసియా దేశాల సంఘం (ASEAN) లోని ADMM-ప్లస్ ఫ్రేమ్‌వర్క్‌లో ఈ సమావేశం జరిగింది. ఈ వేదికలో ASEAN సభ్య దేశాలతో పాటు, భారతదేశం, యునైటెడ్ స్టేట్స్, చైనా, రష్యా, జపాన్, దక్షిణ కొరియా, ఆస్ట్రేలియా, న్యూజిలాండ్‌లు డైలాగ్ పార్ట్‌నర్స్‌గా పాల్గొన్నాయి. భారత్, అమెరికా మధ్య కుదిరిన ఈ ఒప్పందంతో ఇరు దేశాల రక్షణ సంబంధాలు గతంలో ఎన్నడూ లేనంత బలంగా ఉన్నాయని అమెరికా రక్షణ కార్యదర్శి స్పష్టం చేశారు.
