మావోయిస్టు పార్టీకి అత్యంత కీలకమైన కేంద్ర కమిటీ, పొలిట్‌బ్యూరోలో సభ్యుడిగా ఉన్న అగ్రనేత మల్లోజుల వేణుగోపాల్ రావు అలియాస్ సోనూ పోలీసులకు లొంగిపోవడం దేశవ్యాప్తంగా సంచలనం సృష్టిస్తోంది. మహారాష్ట్రలోని గడ్చిరోలిలో ఆయన తన అనుచరులు సుమారు 60 మందితో కలిసి పోలీసుల ఎదుట లొంగిపోయారు. ఈ పరిణామం మావోయిస్టు ఉద్యమానికి ఊహించని షాక్‌గా విశ్లేషకులు భావిస్తున్నారు, అత్యున్నత స్థాయిలో జరిగిన ఈ లొంగుబాటు మావోయిస్టు కార్యకలాపాలపై తీవ్ర ప్రభావం చూపనుంది.
గత కొంతకాలంగా పార్టీ అనుసరిస్తున్న విధానాలపై వేణుగోపాల్ తీవ్ర అసంతృప్తితో ఉన్నట్లు తెలుస్తోంది. విప్లవోద్యమాన్ని విజయవంతం చేయాలంటే ప్రజల్లోకి బహిరంగంగా వెళ్లడమే సరైన మార్గమని ఆయన బలంగా భావించినట్లు సమాచారం. ఇదే విషయాలను ప్రస్తావిస్తూ ఆయన పార్టీకి రాసిన ఓ లేఖ గతంలో తీవ్ర కలకలం రేపింది. దివంగత మావోయిస్టు నేత, తన సోదరుడైన మల్లోజుల కోటేశ్వరరావు (కిషన్‌జీ) పేరుతో రాసిన మరో లేఖలో కూడా ఆయన తన అసంతృప్తిని స్పష్టంగా వెళ్లగక్కినట్లు తెలిసింది.
ఈ అంతర్గత కారణాల నేపథ్యంలోనే తాను పార్టీ నుంచి శాశ్వతంగా వైదొలగుతున్నట్లు వేణుగోపాల్ ప్రకటించారు. కొన్ని అనివార్య కారణాల వల్ల పార్టీలో ఇకపై కొనసాగలేనని స్పష్టం చేస్తూ మావోయిస్టు పార్టీని వీడినట్లు తెలిపారు. ఈ ప్రకటన చేసిన కొద్ది రోజులకే, తన అనుచరులతో కలిసి గడ్చిరోలి పోలీసుల ఎదుట లొంగిపోవడం గమనార్హం. ఆయన లొంగుబాటుకు దారితీసిన కచ్చితమైన కారణాలు, తదుపరి పరిణామాలపై పోలీసులు లోతుగా ఆరా తీస్తున్నారు.
