భారత ప్రధాని నరేంద్ర మోదీ నిన్న బాల్కన్ దేశమైన క్రొయేషియాలో ప‌ర్య‌టించారు. ఈ దేశాన్ని సందర్శించిన తొలి భారత ప్రధానిగా ఆయన చరిత్ర సృష్టించారు. జాగ్రెబ్‌లోని హోటల్‌కు చేరుకున్న ప్రధాని మోదీకి ప్రవాస భారతీయులు అపూర్వ స్వాగతం పలికారు. ‘వందేమాతరం’, ‘భారత్ మాతా కీ జై’ నినాదాలతో ఆ ప్రాంగణమంతా మార్మోగిపోయింది. సంప్రదాయ భారతీయ నృత్య ప్రదర్శనలతో కూడిన సాంస్కృతిక కార్యక్రమం ప్రత్యేక ఆకర్షణగా నిలిచింది.
ఈ సందర్భంగా ఒక అరుదైన దృశ్యం ఆవిష్కృతమైంది. శ్వేత వస్త్రాలు ధరించిన కొందరు క్రొయేషియా జాతీయులు ప్రధాని మోదీతో కలిసి గాయత్రీ మంత్రంతో పాటు ఇతర సంస్కృత శ్లోకాలను పఠించారు. ఇది భారత్, క్రొయేషియాల మధ్య ఉన్న బలమైన సాంస్కృతిక సంబంధాలకు నిదర్శనంగా నిలిచింది. ఈ అపురూప ఘట్టానికి సంబంధించిన వీడియోను ప్రధాని మోదీ తన అధికారిక ఎక్స్ (ట్విట్ట‌ర్‌) ఖాతాలో పంచుకున్నారు.
“సాంస్కృతిక బంధాలు బలంగా, ఉత్సాహపూరితంగా ఉన్నాయి! జాగ్రెబ్‌లో లభించిన స్వాగతంలో ఇదొక భాగం. భారతీయ సంస్కృతికి క్రొయేషియాలో ఇంతటి గౌరవం లభించడం సంతోషంగా ఉంది” అని మోదీ ట్వీట్ చేశారు.
జాగ్రెబ్‌లో తనకు లభించిన ఆత్మీయ స్వాగతం, సాంస్కృతిక ప్రదర్శనలతో కూడిన ముఖ్యాంశాలను ప్రధాని మోదీ రెండు నిమిషాల నిడివిగల మరో వీడియోలో పంచుకున్నారు. “జాగ్రెబ్‌లో చిరస్మరణీయ స్వాగతం, ఆప్యాయత, అనురాగాలతో నిండిపోయింది! ఇవిగో ముఖ్యాంశాలు” అని ఆ పోస్టులో పేర్కొన్నారు.
క్రొయేషియాలోని భారతీయ సమాజం ఆ దేశ ప్రగతికి ఎంతగానో దోహదపడిందని, అదే సమయంలో తమ భారతీయ మూలాలతో అనుబంధాన్ని కొనసాగిస్తోందని ప్రధాని మోదీ ప్రశంసించారు.
“జాగ్రెబ్‌లో నేను భారతీయ సమాజంలోని కొందరు సభ్యులతో ముచ్చటించాను. వారు నాకు మరచిపోలేని స్వాగతం పలికారు. ఈ పర్యటన పట్ల, ఇరు దేశాల మధ్య బంధాన్ని మరింత బలోపేతం చేయడంలో దీని ప్రభావం పట్ల ఇక్కడి భారతీయ సమాజంలో అపారమైన ఉత్సాహం ఉంది!” అని మోదీ ‘ఎక్స్’ వేదికగా తెలిపారు.
అటు క్రొయేషియా ప్రధాని ఆండ్రెజ్ ప్లెన్‌కోవిచ్ స్వయంగా విమానాశ్రయానికి వచ్చి ప్రధాని మోదీకి స్వాగతం పలక‌డం విశేషం. జీ7 సదస్సులో పాల్గొని, పలు ప్రపంచ దేశాల నేతలతో చర్చలు జరిపిన అనంతరం ప్రధాని కెనడా నుంచి ఇక్కడికి చేరుకున్నారు. ఈ పర్యటనలో భాగంగా ఆయన అంతకుముందు సైప్రస్‌ను కూడా సందర్శించిన విషయం తెలిసిందే.
