ప్రస్తుతం ఫ్యాన్సీ నంబర్ ప్లేట్ల ట్రెండ్ నడుస్తోంది. సంపన్నులు తమ వాహనాలకు ఫ్యాన్సీ నంబర్ల కోసం ఎంత వెచ్చించడానికైనా వెనకాడటం లేదు. తాజాగా.. ఖైరతాబాద్ ఆర్టీఏ పరిధిలో ఈ వేలం నిర్వహించగా.. ఓ సంస్థ తన కొత్త కారుకు రాష్ట్రంలో తొలిసారిగా రూ.25.50 వెచ్చించి 9999 ఫ్యాన్సీ నంబర్ను దక్కించుకుంది.
మార్కెట్లోకి వచ్చే సరికొత్త వాహనాలు కొనుక్కోవాలని కొందరు ఆరాటపడతారు. కొనుక్కున్న వాహనాన్నే ఏళ్ల తరబడి జాగ్రత్తగా వాడుకుంటూ మరికొందరు వాహన ప్రియులు మురిసిపోతుంటారు. వీళ్లే కాకుండా.. మరో వర్గం కూడా ఉంటారండీ. వారు కొత్త వాహనాలు కొనుక్కోవటమే కాదు.. ఆ వాహనానికి ఫ్యాన్సీ నంబర్ తీసుకోవాలని తహతహలాడిపోతుంటారు. ఫ్యాన్సీ నంబర్లను దక్కించుకునేందుకు ఎంతైనా ఖర్చుపెడుతుంటారు. కొన్నిసార్లు వాహన ధర కంటే ఫ్యాన్సీ నంబర్ కోసం ఎక్కువ ఖర్చు పెట్టిన సందర్భాలు లేకపోలేదు. అలాంటి వాళ్ల ఆశే తెలంగాణ ఆర్టీఏకు కాసుల వర్షం కురిపిస్తోంది.
ఖైరతాబాద్లోని ఆర్టీఏ కార్యాలయంలో సోమవారం నిర్వహించిన ఫ్యాన్సీ నంబర్ల వేలం ద్వారా ఒక్కరోజే రవాణా శాఖకు రూ.43,70,284 ఆదాయం సమకూరింది. ఖైరతాబాద్లోని రవాణా కార్యాలయంలో సోమవారం కొత్త సిరీస్ ప్రారంభమైన సందర్భంగా ఆన్లైన్ వేలం నిర్వహించగా… రాష్ట్రంలోనే తొలిసారిగా ఒక వాహన ఫ్యాన్సీ నంబరుకు ఏకంగా రూ.25.50 లక్షల ఆదాయం వచ్చింది. TG 09 9999 నంబరును సోని ట్రాన్స్పోర్టు సొల్యూషన్స్ తమ టయోటా ల్యాండ్ క్రూజర్ ఎల్ఎక్స్ కోసం రూ.25,50,002 చెల్లించినట్లు హైదరాబాద్ జేడీసీ సి.రమేశ్ వెల్లడించారు. కాగా, ఫ్యాన్సీ నంబర్ ప్లేట్కు రూ.25.50 లక్షలు వెచ్చించడాన్ని తెలుకున్న కొందరు ఆ ధరతో మధ్య తరగతి వాళ్లు ఓ 4 కార్లు ఈజీగా కొనొచ్చని అంటున్నారు.
