దేశంలో సంచలనంగా మారిన ఢిల్లీ లిక్కర్ స్కాం కేసులో కీలక పరిణామం చోటుచేసుకుంది. ఈ కేసులో భాగంగా అరెస్టయి జ్యుడీషియల్ ఖైదీగా తీహార్ జైలులో ఉన్న బీఆర్ఎస్ ఎమ్మెల్సీ కల్వకుంట్ల కవిత.. గురువారం ఢిల్లీ హైకోర్టును ఆశ్రయించారు. తనకు బెయిల్ మంజూరు చేయాలని హైకోర్టులో పిటిషన్ వేశారు. అయితే.. అంతకుముందు కవిత దాఖలు చేసిన బెయిల్ పిటిషన్ను ఈడీ ప్రత్యేక న్యాయస్థానం తిరస్కరించింది. దీంతో ఎమ్మెల్సీ కల్వకుంట్ల కవిత.. ఢిల్లీ హైకోర్టును ఆశ్రయించింది. ఈ పిటిషన్ మీద ఢిల్లీ హైకోర్టు శుక్రవారం విచారణ జరుపనుంది.
ఢిల్లీ లిక్కర్ స్కాం కేసులో తీవ్ర ఆరోపణలు ఎదుర్కొంటున్న బీఆర్ఎస్ ఎమ్మెల్సీ, కేసీఆర్ కుమార్తె కల్వకుంట్ల కవితకు కోర్టులో మళ్లీ చుక్కెదురైంది. ప్రస్తుతం జ్యుడీషియల్ ఖైదీగా తీహార్ జైలులో ఉన్న కవితకు.. కోర్టు బెయిల్ నిరాకరించిన విషయం తెలిసిందే. పైగా.. కవిత జ్యుడీషియల్ కస్టడీని కూడా రౌజ్ ఎవెన్యూ కోర్టు మరోసారి పొడిగించింది. ఇప్పటికే పలుమార్లు జ్యుడీషియల్ కస్టడీని పొడిగిస్తూ వస్తున్న కోర్టు.. ఇప్పుడు మే 14 వరకు కస్టడీ పొడిగిస్తున్నట్లు వెల్లడించింది. మరోవైపు కేజ్రీవాల్ జ్యుడీషియల్ కస్టడీని కూడా రౌజ్ ఎవెన్యూ కోర్టు ఈ నెల 20 వరకు పొడిగించింది.
అయితే.. ఢిల్లీ లిక్కర్ స్కాం కేసులో కవితను మార్చి 15న ఈడీ అరెస్ట్ చేసిన విషయం తెలిసిందే. ప్రస్తుతం జ్యుడీషల్ కస్టడీలో భాగంగా తీహార్ జైల్లో ఉన్న సమయంలోనే.. ఏప్రిల్ 11వ తేదీన సీబీఐ కూడా అరెస్ట్ చేసింది. అయితే.. ఈడీ, సీబీఐ కేసుల్లో కవిత ప్రస్తుతం రిమాండ్లో కొనసాగుతుండగా.. బెయిల్ కోసం పిటిషన్లు వేయగా.. వాటిని ఈడీ ప్రత్యేక న్యాయస్థానం నిరాకరింటింది. ఢిల్లీ లిక్కర్ స్కాం కేసులో కీలకంగా ఉన్న కవితకు బెయిల్ ఇస్తే.. సాక్ష్యాలు తారుమారు చేసే అవకాశం ఉందంటూ అధికారుల వాదనలను పరిగణలోకి తీసుకున్న న్యాయస్థానం బెయిల్కు నిరాకరించింది. ఇదే సమయంలో.. కస్టడీని కూడా పొడిగించింది.
దీంతో.. ఈడీ ప్రత్యేక న్యాయస్థానం నిర్ణయాన్ని సవాలు చేస్తూ.. ఢిల్లీ హైకోర్టును కవిత ఆశ్రయించింది. తనకు ఎలాంటి సంబంధం లేని కేసులో అన్యాయంగా ఇరికించారని.. రాజకీయ కక్షతోనే తనను అరెస్టు చేశారంటూ ప్రతిసారి ఆరోపిస్తూ వస్తున్న కవిత.. ఇదే వాదనను ఢిల్లీ హైకోర్టులోనూ వినిపించనున్నారు. మరి ఆమె వాదనకు ఢిల్లీ హైకోర్టు ఎలా స్పందించనుందో చూడాలి.
