తెలంగాణ వ్యాప్తంగా నిన్న(నవంబర్ 30)న అసెంబ్లీ ఎన్నికలు ప్రశాంతంగా ముగిశాయి. డిసెంబర్ 3న ఫలితాలు వెల్లడికానున్నాయి. అయితే ఎన్నికలు ముగిసిన వెంటనే వచ్చిన ఎగ్జిట్ పోల్ ఫలితాలు బీఆర్ఎస్ నేతలను ఆందోళనకు గురిచేశాయి. ఈ క్రమంలో శుక్రవారం ప్రగతిభవన్లో బీఆర్ఎస్ అధినేత, ముఖ్యమంత్రి కేసీఆర్తో (CM KCR) పలువురు అభ్యర్థులు, సీనియర్ నేతలు భేటీ అయ్యారు. ఎగ్జిట్పోల్ ఫలితాలపై ముఖ్యమంత్రితో చర్చించారు. ఈ క్రమంలో నేతలకు కేసీఆర్ ధైర్యం చెప్పే ప్రయత్నం చేశారు. వచ్చేది మన ప్రభుత్వమే అని అభయమిచ్చారు. ‘‘ఎందుకు ఆగమాగం, పరేషాన్ అయితుండ్రు… మల్లా మనమే ఈ రాష్ట్రానికి సుపరిపాలన అందించబోతున్నాం. రెండు రోజులు నిమ్మలంగా ఉండండి. 3న అందరం కలిసి సంబరాలు చేసుకుందాం’’ అంటూ ప్రగతిభవన్లో కలిసిన పార్టీ నేతలతో కేసీఆర్ గెలుపు ధీమాను వ్యక్తంచేశారు.
