కెనడా ప్రధాని జస్టిన్ ట్రూడో, ఆయన సతీమణి సోఫీ గ్రెగొయ్‌రీ ట్రూడో తమ 18 ఏళ్ల వైవాహిక బంధానికి వీడ్కోలు పలుకుతున్నట్లు ప్రకటించారు. పలుమార్లు అర్థవంతంగా చర్చించుకున్న అనంతరం తాము ఈ నిర్ణయానికి వచ్చినట్లు ఇన్‌స్టాగ్రామ్ వేదికగా బుధవారం వెల్లడించారు. చట్టబద్ధంగా విడిపోయే ఒప్పందంపై ఇరువురు సంతకాలు చేసినట్లు కెనడా ప్రధానమంత్రి కార్యాలయం తెలిపింది. 2005లో వివాహం చేసుకున్న జస్టిన్ ట్రూడో దంపతులకు ముగ్గురు సంతానం ఉన్నారు. 18 ఏళ్ల వివాహ బంధానికి స్వస్తి పలుకుతూ తాజాగా విడాకులు తీసుకున్నారు. ఇద్దరూ కలిసే పిల్లల సంరక్షణను చూసుకుంటామని ట్రూడో దంపతులు తెలిపారు. ఇప్పటికే ఒట్టావాలోని వేరే నివాసంలోకి వెళ్లిపోయారు సోఫీ. పిల్లల్ని చూసుకునేందుకు రిడియా కాటేజికి వస్తుంటానని, అధికారిక పర్యటనల నిమిత్తం ప్రధాని వెళ్లినప్పుడూ పిల్లల్ని చూసుకునేందుకు అక్కడే ఉంటానని సోఫీ గ్రెగొయ్‌రీ ట్రూడో ప్రకటించారు. ఎప్పటిమాదిరిగానే తమ మధ్య ప్రేమ, పరస్పర గౌరవం ఉంటాయని దంపతులిద్దరూ తెలిపారు.
