పరీక్ష లీకేజీ నేపథ్యంలో 50 మందికి పైగా సిబ్బందిని తొలగించిన జాతీయ పరీక్షల ఏజెన్సీ (ఎన్టీఏ), కీలకమైన నాయకత్వ స్థానాల్లో నిపుణులను నియమిస్తోంది. ఇటీవల నీట్-యూజీ 2026 పేపర్ లీక్ ఆరోపణలు, యూజీసీ-నెట్ పరీక్షల్లో తలెత్తిన వివాదాల నేపథ్యంలో ఈ నిర్ణయం తీసుకున్నట్లు కేంద్ర విద్యాశాఖ ఒక ప్రకటనలో తెలిపింది.
కేంద్ర విద్యాశాఖ మంత్రి ప్రహ్లాద్ జోషి, ఉన్నత విద్యాశాఖ కార్యదర్శి, ఎన్టీఏ డైరెక్టర్ జనరల్తో ఉన్నత స్థాయి సమీక్షా సమావేశం నిర్వహించారు. అనంతరం కేంద్ర విద్యాశాఖ విడుదల చేసిన ప్రకటన ప్రకారం, చీఫ్ టెక్నాలజీ ఆఫీసర్, చీఫ్ ఫైనాన్స్ ఆఫీసర్, చీఫ్ ఇన్ఫర్మేషన్ సెక్యూరిటీ ఆఫీసర్ (సీఐఎస్ఓ) వంటి 10 కీలకమైన పదవుల భర్తీకి నియామక ప్రక్రియను ప్రారంభించినట్లు వెల్లడించింది.
సైబర్ సెక్యూరిటీ, సైకోమెట్రిక్స్, ప్రశ్నపత్రాల రూపకల్పన వంటి విభాగాల్లో ప్రైవేట్ రంగ నిపుణులను కూడా నియమించుకుంటున్నట్లు మంత్రిత్వ శాఖ పేర్కొంది. పరీక్షల నిర్వహణలో నిర్దేశిత నిబంధనలను అత్యంత కఠినంగా పాటించాలని కేంద్రమంత్రి అధికారులను ఆదేశించారు.
రహస్య కార్యకలాపాల వ్యవస్థను, ముఖ్యంగా స్ట్రాంగ్ రూమ్లు, ఎయిర్-గ్యాప్డ్ సిస్టమ్స్ వంటి భద్రతా ఏర్పాట్లను యుద్ధ ప్రాతిపదికన పూర్తిగా ఆధునికీకరించాలని సూచించారు. అన్ని పరీక్షా ప్రక్రియలపై పూర్తిస్థాయి ఆడిట్ నిర్వహించి, చేపట్టిన దిద్దుబాటు చర్యలపై సమగ్ర నివేదిక సమర్పించాలని ఎన్టీఏను ఆదేశించారు.
