ఆంధ్రప్రదేశ్ ఉప ముఖ్యమంత్రి మరియు గ్రామీణ నీటి సరఫరా శాఖ మంత్రి పవన్ కల్యాణ్ ఉభయ గోదావరి జిల్లాల ప్రజల దాహార్తిని తీర్చే లక్ష్యంతో ‘అమరజీవి జలధార’ పథకానికి శంకుస్థాపన చేశారు. ప్రతి ఇంటికీ కొళాయి ద్వారా సురక్షితమైన తాగునీటిని అందించడమే ఈ ప్రాజెక్టు ప్రధాన ఉద్దేశం. కూటమి ప్రభుత్వం అధికారంలోకి వచ్చిన తర్వాత ఇచ్చిన మరో కీలక హామీని నెరవేర్చే దిశగా ఈ అడుగు పడటంతో స్థానిక ప్రజలు హర్షం వ్యక్తం చేస్తున్నారు.
ఈ సందర్భంగా రాష్ట్ర ఐటీ శాఖ మంత్రి నారా లోకేశ్ స్పందిస్తూ.. ప్రజలకు స్వచ్ఛమైన జలాలు అందించేందుకు పవన్ చేసిన భగీరథ ప్రయత్నం ఫలించిందని కొనియాడారు. కూటమి ప్రభుత్వం తరపున పవన్ కల్యాణ్కు ఆయన హృదయపూర్వక అభినందనలు తెలియజేశారు. ప్రధాని నరేంద్ర మోదీ నేతృత్వంలోని ‘జల్ జీవన్ మిషన్’ పథకాన్ని రాష్ట్రంలో పూర్తిస్థాయిలో సద్వినియోగం చేసుకుంటూ ఈ బృహత్తర కార్యక్రమానికి శ్రీకారం చుట్టడం ఎంతో సంతృప్తిని ఇస్తోందని లోకేశ్ పేర్కొన్నారు.
మంత్రి లోకేశ్ అభినందనలపై పవన్ కల్యాణ్ ధన్యవాదాలు తెలియజేస్తూ ‘ఎక్స్’ (ట్విట్టర్) వేదికగా స్పందించారు. ప్రజలందరికీ రోజుకు కనీసం 55 లీటర్ల సురక్షిత తాగునీరు అందించాలనే లక్ష్యంతో ముందుకు వెళ్తున్నట్లు ఆయన తెలిపారు. ఇదే సమయంలో మధ్యాహ్న భోజన పథకానికి డొక్కా సీతమ్మ గారి పేరు పెట్టినందుకు లోకేశ్కు కృతజ్ఞతలు తెలుపుతూ, ఉభయ గోదావరి జిల్లాల అభివృద్ధికి తాము కట్టుబడి ఉన్నామని పవన్ పునరుద్ఘాటించారు.
