దేశంలో అత్యంత ఖనిజ సంపద కలిగిన రాష్ట్రాల్లో ఒకటైన రాజస్థాన్, ఇప్పుడు బంగారు నిల్వల విషయంలో మరో సంచలనం సృష్టించింది. ఆ రాష్ట్రంలోని గిరిజన ప్రాంతమైన బాన్స్‌వారా జిల్లాలోని ఘటోల్ తెహసీల్ – కంకారియా గ్రామం పరిధిలో ఆ రాష్ట్రంలో మూడో భారీ బంగారు నిల్వలు ఉన్నట్లు అధికారులు ధృవీకరించారు. భూగర్భ శాస్త్రవేత్తల సర్వేల ప్రకారం, ఈ కొత్త గనిలో సుమారు 3 కిలోమీటర్ల విస్తీర్ణంలో బంగారు ఖనిజ నిల్వలు ఉన్నట్లు స్పష్టమైన ఆధారాలు లభించాయి.
ఈ కొత్త బంగారు నిల్వల్లో అత్యంత భారీగా పసిడి లభించబోతున్నట్లు భూగర్భ శాఖ ప్రాథమికంగా అంచనా వేస్తోంది. 940.26 హెక్టార్ల విస్తీర్ణంలో సుమారు 113.52 మిలియన్ టన్నుల బంగారు ఖనిజం ఉండవచ్చని అంచనా. ఈ ఖనిజాన్ని ప్రాసెస్ చేసిన తర్వాత సుమారు 222.39 టన్నుల స్వచ్ఛమైన బంగారు లోహం లభించవచ్చని నిపుణులు చెబుతున్నారు. రాజస్థాన్‌లో ఇప్పటివరకు బయటపడిన అతిపెద్ద బంగారు నిల్వల్లో ఇది ఒకటిగా పేర్కొంటున్నారు.
కంకారియా-గారా ప్రాంతంలో బంగారంతో పాటు అనేక విలువైన ఖనిజాలు కూడా వెలికితీసే అవకాశం ఉందని ప్రభుత్వ వర్గాలు తెలిపాయి. ఈ నిల్వలు బయటపడటంతో, భవిష్యత్తులో దేశానికి కావాల్సిన మొత్తం బంగారం డిమాండ్‌లో 25 శాతం వరకు బాన్స్‌వారా జిల్లా నుంచే సరఫరా అవుతుందని నిపుణులు అంచనా వేస్తున్నారు. ఈ ప్రాంతంలో మైనింగ్ కార్యకలాపాలు ప్రారంభమైతే, బాన్స్‌వారా జిల్లా భారీగా ఉపాధి అవకాశాలు సృష్టించడంతో పాటు, రాజస్థాన్‌లో ఒక కీలక పారిశ్రామిక, ఆర్థిక కేంద్రంగా మారుతుందని ప్రభుత్వ వర్గాలు భావిస్తున్నాయి. లైసెన్స్ కోసం బిడ్లు నవంబర్ 3వ తేదీన తెరవనున్నారు.
