మెగాస్టార్ చిరంజీవి మరియు నయనతార జంటగా నటిస్తున్న తాజా చిత్రం ‘మన శంకర వరప్రసాద్ గారు’ సంక్రాంతి పండుగ సందర్భంగా ప్రేక్షకుల ముందుకు రానుంది. అనిల్ రావిపూడి దర్శకత్వం వహిస్తున్న ఈ చిత్రం ఇప్పటికే పోస్టర్లు, గ్లింప్స్ ద్వారా మెగా అభిమానులను బాగా ఆకట్టుకుంది. ప్రమోషన్లలో భాగంగా దూకుడు పెంచిన మేకర్స్.. ఇటీవల విడుదల చేసిన ‘మీసాల పిల్ల’ సాంగ్ ప్రోమోకు అద్భుతమైన స్పందన రావడంతో, తాజాగా ఈ పాట ఫుల్ లిరికల్ వీడియోను విడుదల చేశారు. ఈ పాట చిరంజీవి గ్రేస్ ఫుల్ డ్యాన్స్ మరియు నయనతార అందాలతో అలరిస్తోంది.
‘హే మీసాల పిల్ల.. నీ ముక్కు మీద కోపం కొంచెం తగ్గాలే పిల్లా..” అంటూ సాగే ఈ పాట భార్యాభర్తల మధ్య సరదా సన్నివేశంలో చిత్రీకరించబడింది. ఇందులో చిరంజీవి, నయనతార భార్యాభర్తలుగా నటించారు. తనపై అలిగిన నయనతారను ఆటపట్టిస్తూ, బుజ్జగించే సందర్భంలో ఈ పాటను షూట్ చేశారు. చిరంజీవి తనదైన గ్రేస్‌ఫుల్ స్టెప్పులతో ఆకట్టుకోగా, నయనతార మరింత అందంగా కనిపించింది. ఈ పాట విడుదలైన కొద్దిసేపట్లోనే మెగా అభిమానుల నుంచి మంచి ఆదరణ పొందింది.
ఈ పాట సంగీతపరంగా కూడా ప్రేక్షకులను ఆకట్టుకుంటోంది. దీనికి భీమ్స్ సిసిరోలియో ట్యూన్ కంపోజ్ చేయగా, సందర్భానికి తగినట్లుగా అందరూ పాడుకునేలా సరళమైన పదాలతో భాస్కర భట్ల సాహిత్యాన్ని అందించారు. బాలీవుడ్ సీనియర్ గాయకుడు ఉదిత్ నారాయణ్, శ్వేతా మోహన్ గాత్రాలు ఈ పాటకు ప్రత్యేక ఆకర్షణగా నిలిచాయి. సంక్రాంతికి విడుదల కానున్న ఈ సినిమాపై ఇప్పటికే భారీ అంచనాలు నెలకొన్నాయి.
