ప్రముఖ నటుడు అక్కినేని నాగార్జున, విలక్షణ దర్శకుడు శేఖర్ కమ్ముల కాంబినేషన్‌లో తెరకెక్కుతున్న చిత్రం ‘కుబేర’. ఈ సినిమాలో తమిళ స్టార్ హీరో ధనుష్, రష్మిక మందన్న కూడా ప్రధాన పాత్రలు పోషిస్తున్నారు. భారీ అంచనాలతో రూపొందుతున్న ఈ సినిమా గురించి నాగార్జున తాజాగా కొన్ని ఆసక్తికరమైన విషయాలు పంచుకున్నారు. చెన్నైలో జరిగిన ఓ మీడియా సమావేశంలో ఆయన మాట్లాడుతూ, ‘కుబేర’లో తాను ఒక సీబీఐ ఆఫీసర్ పాత్రలో కనిపించనున్నట్లు తెలిపారు.
సినిమాలో తన పాత్ర గురించి వివరిస్తూ, “నేను ఒక మధ్యతరగతి వ్యక్తి పాత్రలో కనిపిస్తాను. సీబీఐ అధికారిగా నటిస్తున్నాను. మంచి చేయాలా, చెడు చేయాలా అనే సంఘర్షణ నా పాత్రలో ఉంటుంది” అని నాగార్జున చెప్పారు. తన పాత్రకు అనేక కోణాలు ఉన్నాయని, దర్శకుడు శేఖర్ కమ్ముల దాన్ని అద్భుతంగా తీర్చిదిద్దారని ప్రశంసించారు. “సూక్ష్మమైన నటనకు మంచి అవకాశం ఉన్న పాత్ర ఇది” అని ఆయన అన్నారు.
ఇటీవలి కాలంలో మల్టీస్టారర్ చిత్రాలు ఎక్కువగా రావడంపై అడిగిన ప్రశ్నకు నాగార్జున స్పందిస్తూ, “మంచి కథలు రావాలంటే స్టార్లు కలిసి పనిచేయాలి. నేను గతంలో చాలా సినిమాలు చేశాను. మా నాన్నగారు (ఏఎన్ఆర్), ఎన్టీఆర్ గారు, కృష్ణ గారు, శోభన్ బాబు గారు.. వీళ్లందరూ కలిసి ఎన్నో చిత్రాల్లో నటించారు” అని గుర్తుచేశారు.
దర్శకుడు శేఖర్ కమ్ములతో పనిచేయడం గురించి మాట్లాడుతూ, “ఆయన ‘ఆనంద్’ సినిమా తీసినప్పటి నుంచీ మనందరికీ ఆయన చిత్రాల గురించి తెలుసు. ఆయన సినిమాలు నాకెంతో ఇష్టం. ఆయన కథల్లో సామాజిక స్పృహ ఉంటుంది” అని నాగ్ పేర్కొన్నారు. చాలాకాలంగా శేఖర్ కమ్ములతో పనిచేయాలని అనుకుంటున్నట్లు తెలిపారు.
‘కుబేర’ చిత్రంలో నాగార్జున, ధనుష్, రష్మికతో పాటు జిమ్ సర్బ్ కూడా ఒక కీలక పాత్రలో నటిస్తున్నారు. జాతీయ అవార్డు గ్రహీత అయిన ధనుష్, శేఖర్ కమ్ములతో కలిసి పనిచేస్తుండటం ఇదే మొదటిసారి కావడంతో సినిమాపై అంచనాలు మరింత పెరిగాయి. ఈ చిత్రానికి దేవి శ్రీ ప్రసాద్ సంగీతం అందిస్తుండగా, నికేత్ బొమ్మి సినిమాటోగ్రాఫర్‌గా పనిచేస్తున్నారు. రామకృష్ణ సబ్బాని, మోనికా నిగోత్రే ప్రొడక్షన్ డిజైనర్లుగా వ్యవహరిస్తున్నారు. చైతన్య పింగళి ఈ చిత్రానికి సహ రచయితగా ఉన్నారు. కావ్య శ్రీరామ్, పూర్వా జైన్ కాస్ట్యూమ్స్ డిజైన్ చేశారు. శ్రీ వెంకటేశ్వర సినిమాస్ పతాకంపై సునీల్ నారంగ్, పుస్కుర్ రామ్ మోహన్ రావు ఈ చిత్రాన్ని నిర్మిస్తున్నారు.
ఈ సినిమాకు సెన్సార్ బోర్డు యూ/ఏ సర్టిఫికెట్ జారీ చేసింది. విడుదల కానున్న వెర్షన్ నిడివి 181 నిమిషాలు (మూడు గంటల ఒక నిమిషం)గా ఉంది. ‘కుబేర’ చిత్రం జూన్ 20న తెలుగు, తమిళం, హిందీ, కన్నడ, మలయాళ భాషల్లో ప్రపంచవ్యాప్తంగా విడుదల కానుంది.
