తెలంగాణ పబ్లిక్ సర్వీస్ కమిషన్ (TGPSC) కొత్త ఛైర్మన్‌గా మాజీ ఐఏఎస్ బుర్రా వెంకటేశం బాధ్యతలు స్వీకరించారు. హైదరాబాద్ నాంపల్లిలోని టీజీపీఎస్సీ కార్యాలయంలో ఆయన టీజీపీఎస్సీ బాధ్యతలు చేపట్టారు. ఈ సందర్భంగా కమిషన్ సభ్యులు, సిబ్బంది ఆయనకు శుభాకాంక్షలు తెలిపారు. బాధ్యతలు చేపట్టిన అనంతరం బుర్రా వెంకటేశం మాట్లాడుతూ.. కీలక వ్యాఖ్యలు చేశారు. అభ్యర్థులకు పూర్తి విశ్వాసం కలిగించడం తన బాధ్యత అని టీజీపీఎస్సీ ఛైర్మన్ బుర్రా వెంకటేశం తెలిపారు. ఇకపై పరీక్షల వాయిదాలు ఉండవని.. అలాంటి ఆలోచనలు ఏమైనా ఉంటే తొలగించుకోండంటూ.. వస్తూనే కొంతమందికి వార్నింగ్ ఇచ్చారు.
60 రోజుల్లోనే డీఎస్సీ రిజల్ట్స్ ఇచ్చినట్టు బుర్రా వెంకటేశం తెలిపారు. టీజీపీఎస్సీ ఫలితాలు కూడా అనుకున్న సమయంలోనే ఇస్తామని ఆయన హామీ ఇచ్చారు. షెడ్యూల్ ప్రకారమే అన్ని జరుగుతాయని బుర్రా వెంకటేశం మరోసారి స్పష్టం చేశారు. ఉద్యోగ నియమాకాల ప్రక్రియ అంతా పూర్తి పారదర్శకంగా జరుగుతుందని తెలిపారు. నిరుద్యోగ అభ్యర్థులకు న్యాయం చేయాలనే ఉద్దేశంతోనే.. మూడున్నర ఏళ్ల సర్వీస్‌ను వదులుకొని వచ్చినట్లు బుర్రా వెంకటేశం తెలిపారు. యూపీఎస్సీతో సమానంగా టీజీపీఎస్సీ పని చేస్తుందని చెప్పుకొచ్చారు.
ఇక నుంచి తానుంటానని.. తన మీద నమ్మకంతో పరీక్షలు రాయాలని అభ్యర్థులకు బుర్రా వెంకటేశం సూచించారు. ఎవరైనా పైరవీ చేస్తానంటే వెంటనే పోలీస్ స్టేషన్‌లో ఫిర్యాదు చేయాలని సూచించారు. పబ్లిక్‌కు అందుబాటులో ఉండేలా ఒక ఫోన్ నంబర్ కూడా పెట్టనున్నట్టు తెలిపారు. టీజీపీఎస్సీ ఛైర్మన్‌కు ఉన్నా విస్తృత అధికారాలను వినియోగించుకుని న్యాయం చేస్తామని బుర్రా వెంకటేశం తెలిపారు. ఐఏఎస్ కావాలన్న తన కల సాకారం అయిందని.. కాగా ఇప్పుడు రాజీనామా చేసి నిరుద్యోగుల కల సాకారం చేసేందుకు వచ్చానంటూ చెప్పుకొచ్చారు.
