వాట్ యాన్ ఐడియా సర్ జీ అంటే ఇదేనమో.. సాధారణంగా ఏసీ ఆన్ చేద్దామనుకొనే వారు కూడా ఎక్కువ సేపు దాన్ని వాడితే కరెంట్ బిల్లు ఎంత పెరుగుతుందోనని కంగారు పడుతుంటారు. అలాంటిది.. ఓ పాడి రైతు ఏకంగా తన గేదెల కోసం ఏసీ పెట్టాడు! అది కూడా ఒకటి కాదండోయ్.. ఏకంగా రెండు ఏసీలు, రెండు ఫ్యాన్లను షెడ్డులో బిగించాడు!! ఎండల వేడి నుంచి మూగజీవాలను కాపాడేందుకు ఈ వినూత్న నిర్ణయం తీసుకున్నాడు. ఇందుకు సంబంధించిన వీడియో నెట్టింట వైరల్ గా మారింది.
ఆ వీడియోలో గేదెలు రెండు ఏసీల నుంచి వచ్చే చల్లదనంతోపాటు ఓ సీలింగ్ ఫ్యాన్, మరో టేబుల్ ఫ్యాన్ నుంచి వచ్చే చల్ల గాలిని ఆస్వాదిస్తూ కనిపించాయి. హాయిగా గడ్డి నెమరేస్తూ సేదతీరాయి. దేశంలోని ఏ ప్రాంతంలో ఇలా జరిగిందో స్పష్టంగా తెలియనప్పటికీ వీడియో బ్యాక్ గ్రౌండ్ లో మాత్రం హర్యానా భాషలో పాట వినిపించింది. ఈ వీడియోను చూసిన నెటిజన్లంతా అవాక్కవుతున్నారు. తన పశువుల పట్ల పాడి రైతు చూపుతున్న ప్రేమకు ముచ్చటపడుతున్నారు. గుల్జార్ సాహెబ్ పేరుతో ఉన్న ఓ యూజర్ ‘ఎక్స్’లో ఈ వీడియోను పోస్ట్ చేశాడు. ‘డబ్బున్న నగరవాసులారా.. మీ దర్పాన్ని మరింత ప్రదర్శించండి’ అంటూ ఆ వీడియో కింద కామెంట్ జత చేశాడు.
