తెలంగాణలో నియామకాల ప్రక్రియలో సీఎం రేవంత్ రెడ్డి కీలక నిర్ణయం తీసుకోనున్నట్టు తెలుస్తోంది. గత సర్కారు హయాంలో ఉద్యోగాల భర్తీ ప్రక్రియలో భాగంగా నిర్వహించిన పరీక్షల్లో పేపర్ లీక్ వ్యవహారాలు, వాయిదా పర్వాలతో గందరగోళం ఏర్పడగా.. ఇప్పుడు కాంగ్రెస్ సర్కారు ప్రత్యేక శ్రద్ధ తీసుకునేందుకు సిద్ధమైంది. టీఎస్పీఎస్పీ ఆధ్వర్యంలో.. ఇప్పటివరకు నిర్వహించిన, నిర్వహించాల్సిన అన్ని పరీక్షలను రీషెడ్యూల్ చేయాలని రాష్ట్ర సర్కార్ నిర్ణయించినట్టు సమాచారం. ఇక నుంచి కాంగ్రెస్ ప్రభుత్వం ప్రకటించిన జాబ్ క్యాలెండర్ ప్రకారమే పరీక్షలు నిర్వహించనున్నట్టు తెలుస్తోంది.
అయితే.. టీఎస్పీఎస్సీ ఛైర్మన్, సెక్రెటరీలతో సీఎం రేవంత్ రెడ్డి సమీక్ష సమావేశం నిర్వహించారు. ఈ సందర్భంగా టీఎస్పీఎస్సీ ప్రక్షాళన, పరీక్షల నిర్వహణ వంటి కీలక అంశాలపై రేవంత్ రెడ్డి చర్చించినట్లు తెలుస్తోంది. ఈ సందర్భంగా టీఎస్పీఎస్సీ పరీక్షలన్నీ రీ షెడ్యూల్ చేయాలని రేవంత్ రెడ్డి నిర్ణయించినట్టు సమాచారం. దీంతో.. గతంలో విడుదల చేసిన నోటిఫికేషన్లలోని పరీక్ష తేదీలను రద్దు చేసి.. కొత్త పరీక్షా తేదీలను త్వరలోనే ప్రకటించేందుకు ప్రభుత్వం కసరత్తు చేస్తున్నట్టు తెలుస్తోంది. ఇందులో గ్రూప్ 1, గ్రూప్ 2 , గ్రూప్ 3 ఉద్యోగాలకు కూడా కొత్త పరీక్షా తేదీలను ప్రకటించనున్నట్టు సమాచారం. అయితే.. ఈ విషయాన్ని ప్రభుత్వం అధికారికంగా ఇప్పటివరకు నిర్ధారించకపోవటం గమనార్హం. బహుశా.. రెండు రోజుల తర్వాత నిర్వహించబోయే రివ్యూ తర్వాత ప్రకటించే అవకాశం ఉందేమో చూడాలి.
మరోవైపు… ఇప్పటికే రేవంత్ రెడ్డి సర్కార్ టీఎస్పీఎస్సీ అధికారులకు కీలక ఆదేశాలు జారీ చేసింది. ఉద్యోగాల భర్తీపై రెండు రోజుల్లో నిర్వహించే రివ్యూ మీటింగ్‌కు.. రాష్ట్రం ఏర్పడినప్పటి నుంచి ఇప్పటి వరకు టీఎస్పీఎస్సీ ద్వారా భర్తీ చేసిన ఉద్యోగాలు, నోటిఫికేషన్ల వివరాలతో రావాలని టీఎస్పీఎస్సీ ఛైర్మన్ బీ జనార్డన్ రెడ్డిని సీఎంఓ ఆదేశించినట్లు సమాచారం.
