కోమటిరెడ్డికి వర్కింగ్ ప్రెసిడెంట్ హెచ్చరిక
హైదరాబాద్‌: చెరుకు సుధాకర్‌కు ఎంపీ కోమటిరెడ్డి వెంకటరెడ్డి బెదిరింపులపై టీ కాంగ్రెస్ వర్కింగ్ ప్రెసిడెంట్ మహేష్ గౌడ్ స్పందించారు. దిగజారుడు వ్యాఖ్యలు సరికాదని, పార్టీలో ఎవరిని కించపరుస్తూ మాట్లాడినా ఒప్పుకోబోమని వార్నింగ్ ఇచ్చారు. కాంగ్రెస్ నేత చెరుకు సుధాకర్‌ను చంపుతానని బెదిరిస్తూ భువనగిరి ఎంపీ కోమటిరెడ్డి వెంకటరెడ్డి మాట్లాడిన ఆడియో కాల్ టీ కాంగ్రెస్‌లో ప్రకంపనలు రేపుతోంది. కోమటిరెడ్డి వర్సెస్ చెరుకు సుధాకర్ మధ్య వార్ తారస్థాయికి చేరుకుంది. పోటాపోటీగా ఇద్దరూ కౌంటర్లు ఇచ్చుకుంటున్నారు. దీంతో టీ కాంగ్రెస్‌లో ఆడియో లీక్ వ్యవహారం చిచ్చు రేపుతోంది.
ఈ క్రమంలో ఫోన్‌లో చెరుకు సుధాకర్‌కు వెంకటరెడ్డి చంపుతానంటూ బెదిరించడంపై కాంగ్రెస్ వర్కింగ్ ప్రెసిడెంట్ మహేష్ గౌడ్ స్పందించారు. ఎవరు.. ఎవరిని కించపరిచేలా మాట్లాడినా ఒప్పుకోబోమని హెచ్చరించారు. స్థాయి దిగజారి మాట్లాడటం సరికాదని సూచించారు. ఏ నేత అయినా నోరు అదుపులో ఉంచుకోవాలన్నారు. వెంకటరెడ్డి లాంటి సీనియర్ నాయకులు అలా మాట్లాడటం సమర్థనీయం కాదని, సొంత పార్టీ నేతపైనే విమర్శలు చేయడం సరికాదని మహేష్ గౌడ్ తెలిపారు.
