సోషల్ మీడియాలో వైరల్
ప్రేమ, సానుభూతి, ఎదుటి వారికి సాయం చేసే గుణం మనుషులకే కాదు.. జంతువుల్లో కూడా ఎక్కువగానే ఉంటుంది. క్రూర జంతువులు కూడా ఒక్కోసారి జాలి చూపిస్తుంటాయి. అలాంటి వీడియోలు మనం ఎన్నో చూసి ఉంటాం. అలాంటి వీడియోలు చూస్తుంటే మనుషుల కంటే జంతువుల్లోనే ఈ ప్రేమ, జాలిగుణం ఎక్కువగా కనిపిస్తుంది. అడవిలోని క్రూర మృగాలు ఎప్పుడూ ఇతర జంతువులను వెటాడే పని మాత్రమే చేస్తాయని మనం నమ్ముతుంటాం. కానీ, వేటాడే మృగాలు సైతం ఆపదలో ఉన్న మరో జీవి ప్రాణాలను కాపాడాతాయని నిరూపించే సంఘటన ఒకటి సోషల్ మీడియాలో వైరల్ అవుతోంది. నీటిలో పడి ప్రాణాలు కోల్పోతున్న ఓ కాకిని ఎలుగుబంటి కాపాడిన వీడియో ఇది.
హంగేరిలోని బుదాపేస్ట్ జూలో జరిగింది ఈ సంఘటన. ఓ కొలను ఒడ్డు వద్ద కాకి ఒకటి ప్రమాదవశాత్తు నీటిలో పడిపోయింది. ప్రాణాలతో కొట్టుమిట్టాడుతూ కనిపించింది. అయితే అదే సమయంలో అక్కడికి ఓ ఎలుగుబంటి వచ్చింది. నీటిలో పడిపోయిన కాకి అరుపులు గమనించిన ఎలుగుబంటి ఆ కాకి వద్దకు వెళ్లింది. నీటిలో మునిగిపోతున్న కాకిని ఎలుగుబంటి చటుక్కున పట్టుకుని ఒడ్డున పడేసి రక్షించింది. తన నోటి సాయంతో కాకి రెక్కలను పట్టుకుని బయటకు తీసింది ఆ ఎలుగుబంటి. ఆ తర్వాత ఎలుగుబంటి తన దారిన తను అక్కడ్నుంచి వెళ్లిపోయింది. కొద్ది సేపటికి ఆ కాకి కూడా అక్కడి నుంచి ఎగిరిపోయింది.
