నిర్మల్ జిల్లాలో వీధి కుక్కలు వరుస దాడులతో ప్రజలను భయబ్రాంతులకు గురి చేస్తున్నాయి. జిల్లాలో మూడు చోట్ల వీధి కుక్కల దాడులకు తెగబడ్డాయి. కడెం మండలం చిన్న బెల్లాల్ గ్రామాంలో ఓ చిన్నారిపై వీధి కుక్కలు దాడి చేశాయి. ఇంటి ముందు ఆడుకుంటున్న సుహాసిని అనే చిన్నారిపై ఆకస్మాత్తుగా కుక్కలు దాడికి పాల్పడ్డాయి. ఈ ఘటనలో చిన్నారి చెంపపై తీవ్ర గాయమైంది. చిన్నారి తల్లిదండ్రులు వెంటనే ప్రభుత్వ ఆసుపత్రికి తరలించారు. అయితే అక్కడ వైద్య సిబ్బంది అందుబాటులో లేకపోవటంతో దాదాపు రెండు గంటల పాటు ఆమెకు వైద్యం అందలేదు. ప్రస్తుతం చిన్నారి ఇంట్లోనే కోలుకుంటుంది.
కుంటాల మండల కేంద్రంలోనూ వీధి కుక్కలు బీభత్సం సృష్టించాయి. వీధిలో నడుచుకుంటూ వెళ్తున్న నలుగురు వ్యక్తులపై కుక్కలు దాడి చేశాయి. దీంతో బాధితులు ఆసుపత్రికి పరుగులు తీశారు. ఖానాపూర్ మండలం గోసంపల్లెలో గొర్రెల మందపై కుక్కలు దాడి చేశాయి. ఈ దాడిలో 7 గొర్రెలు మృతి చెందాయి. దీంతో గొర్రెల కాపారి కన్నీటి పర్యంతమయ్యారు. తనకు జీవనాధారమైన గొర్రెలు చనిపోవటంతో తీవ్ర ఆవేదనకు గురయ్యాడు.
