భారతీయ ఇళ్లలో రాగి, ఇత్తడి పాత్రలకు ప్రత్యేక స్థానం ఉంది. పూజా సామగ్రి, నీటి గ్లాసులు, వంట పాత్రలుగా వీటిని ఇప్పటికీ చాలామంది ఉపయోగిస్తున్నారు. అయితే గాలిలోని తేమ, దుమ్ము కారణంగా కాలక్రమేణా ఈ పాత్రలు నల్లగా లేదా మసకబారినట్లు కనిపిస్తాయి. ఖరీదైన క్లీనర్లు కొనుగోలు చేయాల్సిన అవసరం లేకుండా ఇంట్లో లభించే పదార్థాలతోనే వీటిని శుభ్రం చేసుకోవచ్చు.
ఈ చిట్కా కోసం పిండి, పసుపు, ఉప్పు, నిమ్మరసం అవసరం. ముందుగా ఒక గిన్నెలో కొంత పిండి తీసుకుని అందులో కొద్దిగా పసుపు, ఉప్పు కలపాలి. ఆ తర్వాత నిమ్మరసం వేసి మరీ పల్చగా కాకుండా, మరీ గట్టిగా కాకుండా చిక్కటి పేస్ట్లా తయారు చేసుకోవాలి. ఈ పేస్ట్ను రాగి లేదా ఇత్తడి పాత్ర మొత్తం ఉపరితలంపై సమానంగా పూయాలి.
మరకలు ఎక్కువగా ఉన్న ప్రాంతాల్లో పేస్ట్ను కొంచెం మందంగా పూసి సుమారు ఐదు నిమిషాల పాటు అలాగే ఉంచాలి. నిమ్మరసంలోని సహజ ఆమ్లం, ఉప్పు కలిసి పాత్రపై పేరుకుపోయిన మురికిని తొలగించడంలో సహాయపడతాయి. అనంతరం మెత్తని వస్త్రంతో లేదా మృదువైన స్క్రబ్బర్తో రుద్ది నీటితో శుభ్రంగా కడిగి, పొడిగా తుడిస్తే పాత్రలు మరింత మెరుస్తూ కనిపిస్తాయి.
