యాక్షన్ హీరో గోపీచంద్ తన కెరీర్లో వరుసగా ఆసక్తికరమైన ప్రాజెక్టులను లైన్లో పెడుతున్నారు. ప్రస్తుతం ‘భరత వర్ష’ అనే పీరియాడిక్ యాక్షన్ డ్రామాలో నటిస్తున్న ఆయన, తాజాగా తన 34వ చిత్రాన్ని అధికారికంగా ప్రకటించారు. ఈ సినిమా ద్వారా ప్రముఖ ఫైట్ మాస్టర్ వి.వెంకట్ దర్శకుడిగా పరిచయం కాబోతుండటం విశేషం. టాలీవుడ్లో సంచలన విజయాలకు కేరాఫ్గా నిలిచిన 70ఎంఎం ఎంటర్టైన్మెంట్స్ సంస్థ ఈ చిత్రాన్ని నిర్మిస్తోంది.
విభిన్నమైన కథలతో, కమర్షియల్ హంగులను జోడించి భారీ చిత్రాలను నిర్మించే విజయ్ చిల్లా, శశి దేవిరెడ్డిల 70ఎంఎం ఎంటర్టైన్మెంట్స్ బ్యానర్పై ఈ ప్రాజెక్ట్ రాబోతోంది. ఇది ఒక హై-బడ్జెట్ ఎపిక్ యాక్షన్ డ్రామాగా, భారీ స్థాయిలో రూపుదిద్దుకోనుంది. ఈ సందర్భంగా విడుదల చేసిన అనౌన్స్మెంట్ పోస్టర్ సినిమాపై అంచనాలను పెంచుతోంది.
నారింజ రంగులో మండిపోతున్న ఆకాశం, భారీగా ప్రకాశిస్తున్న సూర్యుడు, ఒక రాతి శిఖరంపై రాజసంగా నిలబడి ఉన్న నల్ల చిరుతపులి.. ఇలా పోస్టర్ మొత్తం ఒక పవర్ఫుల్, మైథిక్ ప్రపంచాన్ని పరిచయం చేస్తోంది. చిరుత శరీరంపై రహస్య భాషను తలపించేలా మెరుస్తున్న గీతలు మరింత ఆసక్తిని రేకెత్తిస్తున్నాయి. ఈ చిత్రం ముడి శక్తి, ఉత్కంఠభరితమైన యాక్షన్తో నిండి ఉంటుందని పోస్టర్ స్పష్టం చేస్తోంది.
ప్రస్తుతం ఇండస్ట్రీలో అత్యంత డిమాండ్ ఉన్న యాక్షన్ కొరియోగ్రాఫర్లలో ఒకరైన వి.వెంకట్, ఈ సినిమా కోసం ఉత్కంఠభరితమైన యాక్షన్ డ్రైవ్తో కూడిన కథను సిద్ధం చేశారు. ప్రస్తుతం ప్రీ-ప్రొడక్షన్ పనులు శరవేగంగా జరుగుతున్నాయి. Gopichand34 పూజా కార్యక్రమాలు రేపు అనగా, ఆదివారం జరగనున్నాయని చిత్ర బృందం తెలిపింది. ఈ భారీ ప్రాజెక్ట్కు అత్యుత్తమ సాంకేతిక నిపుణులు పనిచేస్తున్నారు. శామ్దత్ సినిమాటోగ్రఫీ అందిస్తుండగా, శామ్ సి.ఎస్. సంగీతాన్ని సమకూరుస్తున్నారు. జాతీయ అవార్డు గ్రహీత శ్రీకర్ ప్రసాద్ ఎడిటర్గా, ప్రముఖ ప్రొడక్షన్ డిజైనర్లు రామకృష్ణ-మోనిక ఈ చిత్రానికి పనిచేయనున్నారు. గోపీచంద్ కెరీర్లో ఈ సినిమా ఒక ప్రత్యేక మైలురాయిగా నిలుస్తుందని అభిమానులు అంచనా వేస్తున్నారు.
