మధ్యప్రదేశ్ రాష్ట్రం ఇండోర్లోని తిలక్ నగర్ పోలీస్ స్టేషన్ పరిధిలో బుధవారం తెల్లవారుజామున అత్యంత దారుణమైన అగ్నిప్రమాదం చోటుచేసుకుంది. ఒక ఇంటి బయట ఎలక్ట్రిక్ కారుకు (EV) ఛార్జింగ్ పెట్టిన సమయంలో ఒక్కసారిగా షార్ట్ సర్క్యూట్ జరిగి మంటలు చెలరేగాయి. నిమిషాల వ్యవధిలోనే ఈ మంటలు మూడు అంతస్తుల భవనానికి వ్యాపించాయి. ఆ సమయంలో ఇంట్లో ఉన్న వారంతా గాఢ నిద్రలో ఉండటంతో, మంటల నుంచి తప్పించుకునే అవకాశం లేకుండా పోయింది. ఈ ప్రమాదంలో ఒకే కుటుంబానికి చెందిన ఏడుగురు సజీవదహనం కావడం స్థానికంగా తీవ్ర కలకలం రేపింది.
పోలీసుల కథనం ప్రకారం, స్థానిక వ్యాపారి మనోజ్ పుగాలియా తన ఎలక్ట్రిక్ కారును ఇంటి బయట ఛార్జింగ్కు పెట్టారు. ఛార్జింగ్ పాయింట్ వద్ద జరిగిన షార్ట్ సర్క్యూట్ వల్ల కారులో మొదలైన మంటలు భవనానికి విస్తరించాయి. ఇంట్లో సుమారు పదికి పైగా గ్యాస్ సిలిండర్లు ఉండటంతో, అవి వరుసగా పేలిపోయి ప్రమాద తీవ్రతను పెంచాయి. ఈ పేలుళ్ల ధాటికి భవనం ఒక వైపు కుప్పకూలిపోయింది. మనోజ్ పుగాలియా పాలిమర్ వ్యాపారి కావడంతో, ఇంట్లో నిల్వ ఉన్న రసాయనాలు కూడా మంటలు వేగంగా వ్యాపించడానికి కారణమయ్యాయి.
ప్రమాదం జరిగిన సమయంలో ఇంట్లో సుమారు పది మంది ఉన్నారు. మంటల వల్ల విద్యుత్ సరఫరా నిలిచిపోవడంతో బాధితులు లోపలే చిక్కుకుపోయారు. సమాచారం అందుకున్న రెస్క్యూ టీమ్ తలుపులు బద్దలు కొట్టి లోపలికి వెళ్లేసరికే ఏడుగురు ప్రాణాలు కోల్పోయారు. మృతుల్లో చిన్నపిల్లలు, వృద్ధులు కూడా ఉండటం విషాదకరం. మనోజ్ పుగాలియా ఇంట్లో జరుగుతున్న ఒక వేడుక కోసం వచ్చిన బంధువులు ఇలా విగతజీవులుగా మారడంతో ఆ ప్రాంతంలో విషాద ఛాయలు అలముకున్నాయి. పోలీసులు కేసు నమోదు చేసి దర్యాప్తు చేస్తున్నారు.
