ప్రముఖ నటి రేణు దేశాయ్ను సోషల్ మీడియాలో వ్యక్తిగతంగా లక్ష్యంగా చేసుకుని, అసభ్యకర వ్యాఖ్యలతో వేధింపులకు పాల్పడుతున్న ఇద్దరు వ్యక్తులను సైబరాబాద్ పోలీసులు మంగళవారం అరెస్ట్ చేశారు. తనపై నిరంతరాయంగా జరుగుతున్న అసభ్యకర ప్రచారంపై ఆమె పోలీసులకు ఫిర్యాదు చేయడంతో ఈ చర్యలు చేపట్టారు. సెలబ్రిటీల వ్యక్తిగత జీవితాలను కించపరిచేలా వ్యవహరిస్తే కఠిన చర్యలు తప్పవని ఈ సందర్భంగా పోలీసులు తీవ్రంగా హెచ్చరించారు.
రేణు దేశాయ్ ఫిర్యాదు ప్రకారం, ప్రధానంగా నాలుగు వేర్వేరు సోషల్ మీడియా ఖాతాల ద్వారా ఆమెను టార్గెట్ చేస్తూ విమర్శలు మరియు వేధింపులు కొనసాగుతున్నాయి. ఈ ఫిర్యాదును స్వీకరించిన సైబరాబాద్ సైబర్ క్రైమ్ విభాగం, సాంకేతిక ఆధారాల సహాయంతో నిందితులను గుర్తించి అదుపులోకి తీసుకుంది. భావ ప్రకటనా స్వేచ్ఛ పేరుతో ఇతరుల ప్రైవసీని దెబ్బతీసేలా ప్రవర్తించడం చట్టరీత్యా నేరమని పోలీసులు స్పష్టం చేశారు.
ఇదివరకు నటి అనసూయ భరద్వాజ్ ఫిర్యాదు మేరకు కూడా పోలీసులు ఇలాంటి చర్యలే తీసుకున్న విషయాన్ని అధికారులు గుర్తు చేశారు. సోషల్ మీడియాలో వేధింపులకు పాల్పడే వారిపై నిఘా ఉందని, బాధితులు ధైర్యంగా ముందుకు వచ్చి ఫిర్యాదు చేయాలని కోరారు. ఇతరుల పట్ల అసభ్యకరంగా ప్రవర్తించి చట్టపరమైన ఇబ్బందుల్లో పడవద్దని నెటిజన్లకు పోలీసులు సూచించారు.
