తమిళనాడు అసెంబ్లీ ఎన్నికల వేళ రాజకీయ వాతావరణం ఒక్కసారిగా వేడెక్కింది. నటుడు విజయ్ స్థాపించిన తమిళగ వెట్రి కళగం (TVK) పార్టీ ప్రధాన కార్యదర్శి ఆదవ్ అర్జున్ ఇటీవల చేసిన వ్యాఖ్యలు తీవ్ర దుమారం రేపాయి. 2020లో రజినీకాంత్ రాజకీయాల్లోకి రాకుండా ఉండటానికి డీఎంకే బెదిరింపులే కారణమని, కానీ తమ నేత విజయ్ అలాంటి ఒత్తిళ్లకు లొంగరని ఆయన వ్యాఖ్యానించారు. ఈ ఆరోపణలు అటు రజినీ అభిమానుల్లో, ఇటు రాజకీయ వర్గాల్లో పెద్ద చర్చకు దారితీశాయి.
ఈ వివాదంపై సూపర్స్టార్ రజినీకాంత్ సోషల్ మీడియా వేదికగా స్పష్టత ఇచ్చారు. టీవీకే నేత చేసిన వ్యాఖ్యలు పూర్తిగా అవాస్తవమని ఆయన కొట్టిపారేశారు. ఈ సందర్భంగా తనకు మద్దతుగా నిలిచిన వారికి కృతజ్ఞతలు తెలుపుతూ.. “కాలం మాట్లాడకపోవచ్చు కానీ, సరైన సమయంలో అన్నింటికీ సమాధానం ఇస్తుంది” అంటూ ఎక్స్ (ట్విట్టర్)లో పోస్ట్ పెట్టారు. తప్పుడు ప్రచారాలను నమ్మవద్దని, వాస్తవాలు కాలక్రమేణా బయటకు వస్తాయని ఆయన పరోక్షంగా చురకలంటించారు.
గతంలో 2020లో రజినీకాంత్ తన రాజకీయ అరంగేట్రంపై వెనక్కి తగ్గినప్పుడు, కేవలం ఆరోగ్య కారణాల రీత్యానే ఆ నిర్ణయం తీసుకున్నట్లు స్వయంగా ప్రకటించిన విషయం తెలిసిందే. ప్రస్తుతం తమిళనాడులో ఏప్రిల్ 23న జరగనున్న అసెంబ్లీ ఎన్నికల నేపథ్యంలో ఈ పాత అంశం మళ్ళీ తెరపైకి రావడం రాజకీయంగా ప్రాధాన్యత సంతరించుకుంది. ఈ వివాదం కారణంగా టీవీకే మరియు బీజేపీ మధ్య పొత్తు పొడిచే అవకాశాలు కూడా దెబ్బతిన్నట్లు విశ్లేషకులు భావిస్తున్నారు.
