వైసీపీ సీనియర్ నేత, మాజీ మంత్రి అంబటి రాంబాబుకు వరుస ఎదురుదెబ్బలు తగులుతున్నాయి. ఇప్పటికే ముఖ్యమంత్రి చంద్రబాబు నాయుడుపై అనుచిత వ్యాఖ్యలు చేసిన కేసులో రిమాండ్లో ఉన్న ఆయనకు, ఇప్పుడు మరో కేసులో కోర్టు షాక్ ఇచ్చింది. మెడికల్ కాలేజీల నిర్వహణను పీపీపీ (PPP) విధానంలోకి మార్చడాన్ని నిరసిస్తూ నిర్వహించిన ఆందోళనలో పోలీసుల విధులకు ఆటంకం కలిగించారనే ఆరోపణలపై స్పెషల్ జ్యుడీషియల్ కోర్టు ఆయనకు 14 రోజుల రిమాండ్ విధించింది.
ఈ కేసు వివరాల్లోకి వెళితే, గతంలో ప్రభుత్వ నిర్ణయానికి వ్యతిరేకంగా వైసీపీ చేపట్టిన నిరసన కార్యక్రమం ఉద్రిక్తంగా మారింది. ఆ సమయంలో అంబటి రాంబాబు బ్యారికేడ్లను తోసివేసి, పోలీసులతో వాగ్వాదానికి దిగారని అభియోగాలు నమోదయ్యాయి. దీనిని తీవ్రంగా పరిగణించిన న్యాయస్థానం, ఈ నెల 22వ తేదీ వరకు ఆయనకు రిమాండ్ విధిస్తూ ఉత్తర్వులు జారీ చేసింది. దీంతో ఆయన జైలు జీవితం మరికొంత కాలం పొడిగించబడినట్లయింది.
ప్రస్తుతం చంద్రబాబుపై చేసిన వ్యాఖ్యల కేసులో బెయిల్ కోసం అంబటి దాఖలు చేసిన పిటిషన్ గుంటూరు మొబైల్ కోర్టులో విచారణలో ఉంది. ఈ విచారణ ప్రక్రియ ముగిసిన అనంతరం, భద్రతా కారణాల దృష్ట్యా పోలీసులు ఆయన్ను తిరిగి రాజమండ్రి సెంట్రల్ జైలుకు తరలించనున్నారు. వరుసగా నమోదవుతున్న కేసులు మరియు రిమాండ్లతో వైసీపీ శ్రేణుల్లో ఆందోళన వ్యక్తమవుతోంది.
