బలోచ్ లిబరేషన్ ఆర్మీ విడుదల చేసిన ఈ వీడియోలో, హవా బలోచ్ తన మరణానికి సుమారు 12 గంటల ముందు మాట్లాడినట్లు తెలుస్తోంది. పాకిస్థాన్ సైన్యాన్ని “పంజాబీ సైన్యం”గా అభివర్ణిస్తూ, వారు తమను నేరుగా ఎదుర్కొనే ధైర్యం లేక దూరం నుండి కాల్పులు జరుపుతున్నారని ఆమె ఎద్దేవా చేశారు. బలూచ్ ప్రజలు, ముఖ్యంగా మహిళలు ధైర్యంగా ముందుకు వచ్చి తమ గడ్డ కోసం పోరాడాలని ఆమె పిలుపునిచ్చారు. యుద్ధం ఎలా ఉందన్న సహచరుడి ప్రశ్నకు ఆమె నవ్వుతూ “చాలా సరదాగా ఉంది” అని సమాధానం ఇవ్వడం ఆ వీడియోలో స్పష్టంగా కనిపిస్తోంది.
హవా బలోచ్ నేపథ్యం పరిశీలిస్తే, ఆమె ఒక విద్యావంతురాలని మరియు బీఎల్ఏ ఫైటర్ అయిన ఆమె తండ్రి 2021లో పాక్ సైన్యం చేతిలో మరణించారని తెలుస్తోంది. దశాబ్దాలుగా సాగుతున్న బలూచ్ వేర్పాటువాద ఉద్యమంలోకి ఇప్పుడు చదువుకున్న యువత, మహిళలు పెద్ద సంఖ్యలో చేరుతున్నారనే అంశానికి హవా బలోచ్ ఒక ఉదాహరణగా నిలుస్తోంది. పాక్ సైన్యం చేపట్టిన ‘ఆపరేషన్ హరోఫ్’ను అడ్డుకోవడానికి బీఎల్ఏ తన ‘మాజీద్ బ్రిగేడ్’ ద్వారా ఇటువంటి ఆత్మాహుతి దాడులను ప్రోత్సహిస్తోంది.
ప్రస్తుతం బలూచీస్థాన్లో పరిస్థితులు అత్యంత ఉద్రిక్తంగా ఉన్నాయి. పాకిస్థాన్ సైన్యం గత రెండు రోజుల్లో 133 మంది బీఎల్ఏ ఫైటర్లను హతమార్చినట్లు ప్రకటించగా, బీఎల్ఏ మాత్రం తమ వైపు ప్రాణనష్టం తక్కువగానే ఉందని, తామే పాక్ బలగాలకు భారీ నష్టం చేకూర్చామని వాదిస్తోంది. గ్వాదర్ ఫ్రంట్లో జరిగిన ఈ దాడులు పాకిస్థాన్ అంతర్గత భద్రతపై మరోసారి ప్రశ్నలు లేవనెత్తుతున్నాయి.
