భారతీయ సినీ దిగ్గజం, సూపర్ స్టార్ రజనీకాంత్ బయోపిక్ కోసం కోట్లాది మంది అభిమానులు ఎంతో కాలంగా ఎదురుచూస్తున్నారు. సామాన్య బస్సు కండక్టర్ నుంచి అంతర్జాతీయ స్థాయి నటుడిగా ఎదిగిన ఆయన ప్రస్థానాన్ని వెండితెరపై చూడాలని ఆశపడుతున్న తరుణంలో, ఆయన కుమార్తె సౌందర్య రజనీకాంత్ తాజాగా ఒక కీలక అప్డేట్ ఇచ్చారు. తన తండ్రి ఆటోబయోగ్రఫీకి సంబంధించిన పనులు ఇప్పటికే ప్రారంభమయ్యాయని, ఈ చిత్రం ప్రపంచవ్యాప్తంగా సంచలనం సృష్టిస్తుందని ఆమె ధీమా వ్యక్తం చేశారు. నిరాడంబరతకు మారుపేరైన రజనీ సినీ ప్రస్థానం ఎందరికో స్ఫూర్తిదాయకంగా నిలుస్తుందని ఆమె పేర్కొన్నారు.
తన నిర్మాణంలో రూపొందిన ‘విత్ లవ్’ సినిమా ప్రమోషన్లలో భాగంగా సౌందర్య ఈ విశేషాలను పంచుకున్నారు. సూపర్ స్టార్ కూతురుగా ఉండటం బాధ్యతతో కూడిన విషయమని చెబుతూనే, రజనీకాంత్ జీవిత కథను ఎంతో ప్రతిష్టాత్మకగా తెరకెక్కించేందుకు సన్నాహాలు చేస్తున్నట్లు తెలిపారు. గతంలో రజనీతో ‘కోచ్చాడయాన్’ వంటి యానిమేటెడ్ చిత్రాన్ని రూపొందించిన సౌందర్య, భవిష్యత్తులో ఏఐ (AI) మరియు ఆధునిక టెక్నాలజీని వాడుకుంటూ మరిన్ని యానిమేషన్ చిత్రాలను రూపొందించేందుకు ఆసక్తిగా ఉన్నట్లు వెల్లడించారు. భారతదేశంలో యానిమేషన్ చిత్రాలకు ఆదరణ పెరుగుతోందని ఆమె అభిప్రాయపడ్డారు.
సౌందర్య రజనీకాంత్ గతంలో ‘నరసింహ’, ‘శివాజీ’, ‘చంద్రముఖి’ వంటి సినిమాలకు గ్రాఫిక్ డిజైనర్గా పనిచేసి తనకంటూ ఒక గుర్తింపు తెచ్చుకున్నారు. ప్రస్తుతం ఆమె నిర్మించిన ‘విత్ లవ్’ చిత్రం ఫిబ్రవరి 6న విడుదలకు సిద్ధంగా ఉంది. తెలుగులో ఈ చిత్రాన్ని ప్రముఖ నిర్మాణ సంస్థ సురేష్ ప్రొడక్షన్స్ విడుదల చేస్తోంది. రజనీకాంత్ బయోపిక్ వార్త సోషల్ మీడియాలో వైరల్ అవ్వడంతో, తలైవర్ పాత్రను ఎవరు పోషిస్తారనే చర్చ అభిమానుల్లో అప్పుడే మొదలైంది.
