ఒంటిపూట బడులు ప్రకటించిన విద్యాశాఖ..
తెలంగాణలో ఎండ తీవ్రత పెరుగుతోంది. భానుడు తన ప్రతాపాన్ని పెంచుతున్నాడు. దీంతో ఎండ ప్రభావంతో పాటు ఉక్కబోతతో ప్రజలు ఇబ్బందులు పడుతున్నారు. ఎండ ప్రభావం కారణంగా విద్యార్థులకు ఒంటిపూట బడులు నిర్వహించాలని విద్యాశాఖ నిర్ణయించింది. ఈ నెల 15 నుంచి ఒంటిపూట స్కూల్స్ నిర్వహించన్నట్లు విద్యాశాఖ ప్రకటన విడుదల చేసింది.
ఉదయం 7.45 నిమిషాల నుంచి మధ్యాహ్నం 12 గంటల వరకు క్లాసులు నిర్వహించనున్నారు. ప్రతి స్కూల్‌లో తప్పనిసరిగా మంచినీళ్లు విద్యార్థులకు అందుబాటులో ఉంచాలని విద్యాశాఖ అధికారులకు ఆదేశాలు జారీ చేసింది. అలాగే ఏప్రిల్ 25 నుంచి స్కూళ్లకు వేసవి సెలవులు ప్రకటించింది. జూన్ 11 వరకు వేసవి సెలవులు ఉండనున్నాయి. మొత్తం 45 రోజుల పాటు ఈ సారి వేసవి సెలవులు ఇచ్చారు.
ఇక అన్ని క్లాసుల విద్యార్థులకు ఫైనల్ పరీక్ష తేదీలను విద్యాశాఖ ప్రకటించింది. టెన్త్ పరీక్షలు ఏప్రిల్ 3 నుంచి 12 వరకు జరగనున్నాయి. ఉదయం 9.30 నుంచి మధ్యాహ్నం 12.30 గంటల వరకు ఎగ్జామ్స్ నిర్వహిస్తారు. ఈ ఏడాది దాదాపు 5.50 లక్షల మంది విద్యార్థులు పదో తరగతి పరీక్షలు రాయనున్నట్లు అధికారులు చెబుతున్నారు. ఇక 1 నుంచి 5వ తరగతుల విద్యార్థులకు ఏప్రిల్ 12 నుంచి ఏప్రిల్ 17 వరకు పరీక్షలు జరగనున్నాయి. ఆ తర్వాత 6 నుంచి 9వ తరగతుల విద్యార్థులకు ఏప్రిల్ 12 నుంచి ఏప్రిల్ 21 వరకు పరీక్షలు నిర్వహించనున్నారు.
