ఆపద వచ్చినప్పుడు ఆందోళన చెందటమో.. భయంతో చేతులెత్తయటమో.. లేదా స్వార్థంతో మిగతావారి గురించి ఆలోచించకుండా తానొక్కడే ఆ ఆపద నుంచి బయటపడటమో చేస్తే అది హీరో లక్షణం అనిపించుకోదు. ప్రాణంపోయే సందర్భం వచ్చినా.. సమయస్ఫూర్తితో ఆలోచించి.. తననే కాకుండా తన చుట్టూ ఉన్నవారిని కూడా ఆ ఆపద నుంచి బయటపడేయటమే రియల్ హీరో లక్షణం. అచ్చం అలాంటి హీరోనే ఈ ఆర్టీసీ డ్రైవర్. బ్రెకులు ఫెయిల్ అయిన బస్సును సమయస్ఫూర్తితో 45 మందికి ఎలాంటి హాని జరకకుండా కాపాడాడు ఈ రియల్ హీరో. ఈ ఘనట హైదరాబాద్లోని బంజారాహిల్స్ వద్ద జరిగింది.
కోఠి నుంచి పటాన్చెరు వెళ్తున్న బస్సు.. బంజారాహిల్స్లోని కేబీఆర్ పార్కు వద్దకు రాగానే బ్రేకులు ఒక్కసారిగా ఫెయిల్ అయ్యాయి. అప్పటికే రోడ్డు మీద వాహనాల రద్దీ బాగానే ఉంది. ముందు వాహనాలు ఆగిపోవటంతో.. అప్పటివరకు కాస్త స్పీడ్గానే వచ్చిన బస్సును కంట్రోల్ చేసేందుకు బ్రేక్ వేశాడు డ్రైవర్ కానీ పడట్లేదు. ఆ సమయంలో విధుల్లో ఉన్న డ్రైవర్ వెంకటేష్ గౌడ్కు బ్రేకులు ఫెయిల్ అయిన విషయం అర్థం అయింది. కానీ.. ఎలాంటి ఆందోళన చెందకుండా బస్సును ఎలాగైనా ఆపేసి.. అందులో ఉన్న ప్రయాణికులకు ఎలాంటి ముప్పు జరగకుండా కాపాడాలని మాత్రమే అతని మొదడులో మెదిలింది. ఈ సమయంలో తన అనుభవాన్ని వాడాడు మన డ్రైవర్ సాబ్. మొదట హ్యాండ్ బ్రేక్ వేసి బస్సును కొంత వరకు కంట్రోల్ చేసే ప్రయత్నం చేశారు.
అప్పటికి కూడా బస్సు ఆగకపోవటంతో.. ప్రయాణికులకు ఎలాంటి ఆపద కలగకూడదని ఆలోచించాడు. పక్కనే ఉన్న పార్క్ ఫుట్పాత్ ఎక్కించి.. అక్కడికి ఆగకపోతే దిమ్మెకు ఢీకొడితే బస్సు ఆగిపోతుందని వెంకటేష్ ఆలోచించాడు. దీంతో.. వెంటనే బస్సును ఒక్కసారిగా పార్కువైపు తిప్పాడు. కాగా.. ఫుట్ఫాత్పైకి దాదాపు ఎక్కేసిన బస్సు.. అక్కడే ఆగిపోయింది. అయితే.. ఈ సమయంలో బస్సులో 45 మంది ప్రయాణికులు ఉండగా.. ఎలాంటి ప్రమాదం జరగకపోవటంతో అందరూ ఊపిరి పీల్చుకున్నారు.
అయితే.. బస్సును కంట్రోల్ చేసే క్రమంలో ముందున్న ఓ కారును బస్సు కొద్దిగా ఢీకొట్టింది. దీంతో.. ఆ కారు డ్రైవర్ బస్సు డ్రైవర్ మీద ఆగ్రహానికి గురయ్యాడు. దీంతో.. అందులోకి ప్రయాణికులు అసలు విషయాన్ని చెప్పి.. అతను చేసిన సాహసాన్ని వివరించి మందలించటంతో.. కారు డ్రైవర్ అక్కడి నుంచి వెళ్లిపోయాడు. ప్రయాణికులకు ఎవరికి ఎలాంటి హాని కలగకుండా సమయస్ఫూర్తితో వ్యవహరించినందుకు డ్రైవర్ వెంకటేష్ గౌడ్ను అందరూ అభినందించారు.
