తెలంగాణ కళాకారులను ఎంకరేజ్ చేయటంలో తన మార్క్ చూపించుకున్నారు ఆర్థిక శాఖ మంత్రి హరీష్ రావు. ప్రస్తుతం తెలుగు గాయనీ గాయకులను ఎంకరేజ్ చేయటానికి తెలుగు ఓటీటీ మాధ్యమం ఆహా తెలుగు ఇండియన్ ఐడల్ షోను నిర్వహిస్తోన్న సంగతి తెలిసిందే. ఇది రెండో సీజన్ రన్ అవుతోంది. ఇందులో పాల్గొంటున్న కంటెస్టెంట్స్లో ఏడుగురు కంటెస్టెంట్స్ పోటీ పడుతున్నారు. వీరిలో ఎవరు విజేతగా నిలుస్తారనే విషయం అందరిలోనూ ఆసక్తిని పెంచుతోంది. వీరిలో తెలంగాణ రాష్ట్రంలోని సిద్ధి పేటకు చెందిన సింగర్ లాస్య ప్రియ కూడా ఉన్నారు.
తన నియోజక వర్గానికి చెందిన అమ్మాయి తెలుగు ఇండియన్ ఐడల్ 2లో పార్టిసిపేట్ చేస్తుందనే విషయం తెలుసుకున్న హరీష్ రావు తన సోషల్ మీడియా మాధ్యమం ద్వారా ఆమెకు తన మద్దుతుని తెలియజేశారు. ‘‘తెలుగు ఇండియన్ ఐడల్ 2’లో అత్యంత ప్రతిభను చూడటం చాలా ఆనందంగా అనిపించింది. లాస్య ప్రియ గళం నా చెవుల్లో మారుమోగుతోంది. ఆమె భవిష్యత్ ప్రణాళికలన్నీ సఫలం కావాలని ఆకాంక్షిస్తున్నాను” అని ట్వీట్ చేశారు హరీష్ రావు. తన బిజీ పనుల్లో లేడీ సింగర్కు సపోర్ట్ చేస్తూ ట్వీట్ చేసిన హరీష్ రావుని నెటిజన్స్ అభినందిస్తూ కామెంట్స్ పెడుతున్నారు.
సంగీత ప్రియుల్లో అత్యద్భుతమైన ఆదరణ పొందిన కార్యక్రమంగా ఆహా తెలుగు ఇండియన్ ఐడిల్ 2 నిలుస్తోంది. సంగీత ప్రముఖులైన శ్రేయా ఘోషల్, విశాల్ దడ్లానీ, హిమేష్ రేష్మియా, జీవీ ప్రకాష్, దేవిశ్రీ ప్రసాద్, ఆస్కార్ విన్నర్ చంద్రబోస్ తదితరులు ముఖ్య అతిథులుగా ఈ కార్యక్రమంలో పాల్గొని సింగర్స్ను ఎంకరేజ్ చేశారు. ఈ కార్యక్రమానికి మ్యూజిక్ డైరెక్టర్ ఎస్.ఎస్.తమన్, సింగర్స్ కార్తీక్, గీతా మాధురి న్యాయ నిర్ణేతలుగా వ్యవహిస్తున్నారు.
