ఇరాన్ మాజీ సుప్రీం లీడర్ అలీ ఖమేనీ మరణం తర్వాత, ఆయన వారసుడిగా బాధ్యతలు చేపట్టిన మోజ్తాబా ఖమేనీని తమ తదుపరి లక్ష్యంగా ఇజ్రాయెల్ ప్రకటించింది. ఇజ్రాయెల్ డిఫెన్స్ ఫోర్సెస్ (IDF) ప్రతినిధి ఎఫీ డెఫ్రిన్ మాట్లాడుతూ.. మోజ్తాబా ప్రస్తుతం ఎక్కడున్నారనే ఖచ్చితమైన సమాచారం తమ వద్ద లేనప్పటికీ, తమ దేశ భద్రతకు ముప్పుగా పరిణమించే ఎవరినీ వదిలిపెట్టే ప్రసక్తే లేదని స్పష్టం చేశారు. “ఎప్పుడు, ఎక్కడ, ఎలా అనేది ఇప్పుడే చెప్పలేం కానీ, మా గురి మాత్రం తప్పదు” అంటూ ఆయన తీవ్రస్థాయిలో హెచ్చరించారు. ఫిబ్రవరి 28న జరిగిన దాడుల్లో మోజ్తాబా గాయపడ్డారని, ప్రస్తుతం ఆయన రహస్య ప్రాంతంలో చికిత్స పొందుతున్నారని ప్రచారం జరుగుతోంది.
మరోవైపు, మోజ్తాబా ఖమేనీ చికిత్స కోసం రష్యాకు వెళ్లారన్న వార్తలను ఇరాన్ తీవ్రంగా ఖండించింది. ఇరాన్ నాయకులు ప్రజల మధ్యే ఉంటారని, వారికి దాక్కోవాల్సిన అవసరం లేదని రష్యాలోని ఇరాన్ రాయబారి కాజెమ్ జలాలీ స్పష్టం చేశారు. దీనిని ఇజ్రాయెల్ సాగిస్తున్న ‘మానసిక యుద్ధం’గా ఆయన అభివర్ణించారు. అయితే, ఇజ్రాయెల్ మాత్రం తన దాడులను కేవలం అగ్ర నాయకత్వానికే పరిమితం చేయకుండా, ఇరాన్ రివల్యూషనరీ గార్డ్స్కు అనుబంధంగా ఉన్న శక్తివంతమైన ‘బసిజ్’ (Basij) దళాలను కూడా లక్ష్యంగా చేసుకుంటామని ప్రకటించింది. అమెరికా అధ్యక్షుడు డొనాల్డ్ ట్రంప్ సైతం మోజ్తాబాను వదిలిపెట్టబోమని ఇప్పటికే హెచ్చరించడం గమనార్హం.
ఇరాన్ రాజకీయ మరియు సైనిక విభాగాలపై ఇజ్రాయెల్ దాడులు ఇప్పటికే తీవ్రమయ్యాయి. మంగళవారం జరిగిన దాడుల్లో ఇరాన్ సెక్యూరిటీ కౌన్సిల్ చీఫ్ అలీ లారిజానీ, బసీజ్ ఫోర్స్ కమాండర్ జనరల్ గులామ్ రెజా సాల్మనీ మరణించినట్లు ఇజ్రాయెల్ ధ్రువీకరించింది. లారిజానీ తన కుమార్తె నివాసంలో ఉన్న సమయంలో ఈ దాడి జరిగినట్లు సమాచారం. అగ్రశ్రేణి నాయకులు వరుసగా మరణిస్తుండటంతో ఇరాన్ నాయకత్వంలో ఆందోళన నెలకొంది. ప్రస్తుత పరిస్థితుల్లో మోజ్తాబా ఖమేనీ నేతృత్వంలోని ఇరాన్, ఇజ్రాయెల్ మరియు అమెరికా సవాళ్లను ఎలా ఎదుర్కొంటుందనేది అంతర్జాతీయ స్థాయిలో ఉత్కంఠ రేపుతోంది.
