తెలంగాణ శాసనసభలో గవర్నర్ ప్రసంగానికి ధన్యవాదాలు తెలిపే తీర్మానంపై చర్చ సందర్భంగా మంత్రి సీతక్క, బీఆర్ఎస్ వర్కింగ్ ప్రెసిడెంట్ కేటీఆర్పై తీవ్రస్థాయిలో విమర్శలు గుప్పించారు. కేటీఆర్కు మహిళల పట్ల చిన్నచూపు ఉందని, వారు ఎదగడం ఆయనకు ఇష్టం లేదని ఆరోపించారు. ముఖ్యంగా ఉచిత బస్సు ప్రయాణ పథకంపై కేటీఆర్ గతంలో చేసిన వ్యాఖ్యలను ఆమె ఈ సందర్భంగా ఎండగట్టారు.
గత బీఆర్ఎస్ ప్రభుత్వం మహిళా సంక్షేమాన్ని విస్మరించిందని, మహిళలకు చెందిన ‘అభయ హస్తం’ నిధులను కూడా ఇతర అవసరాలకు వాడుకుందని సీతక్క విమర్శించారు. మహిళా సంఘాలపై రూ. 3,000 కోట్ల భారం వేసి వెళ్ళిపోయారని మండిపడ్డారు. ప్రస్తుతం కాంగ్రెస్ ప్రభుత్వం శ్రీనిధి ద్వారా వడ్డీ లేని రుణాలు అందిస్తూ, కోటి మంది మహిళలను కోటీశ్వరులను చేయడమే లక్ష్యంగా పనిచేస్తోందని స్పష్టం చేశారు.
అదే సమయంలో మంత్రి శ్రీధర్ బాబు కూడా కేటీఆర్ వైఖరిని తప్పుపట్టారు. బీఆర్ఎస్ నేతలు గోబెల్స్ ప్రచారంలో మేటి అని, వాస్తవాలను వక్రీకరిస్తున్నారని ఎద్దేవా చేశారు. కాంగ్రెస్ పార్టీ తెలంగాణ ఇవ్వకపోతే బీఆర్ఎస్ నేతలు ఎక్కడ ఉండేవారో ఆత్మపరిశీలన చేసుకోవాలని ఘాటుగా వ్యాఖ్యానించారు. ప్రజా హితం కోసం ప్రభుత్వం చేస్తున్న మంచి పనులను హేళన చేయడం సరికాదని ఆయన హితవు పలికారు.
