డైరెక్టర్ గుణశేఖర్ దర్శకత్వంలో తెరకెక్కిన ‘యుఫోరియా’ చిత్రం ఫిబ్రవరి 6న విడుదలకు సిద్ధమైంది. ఈ సందర్భంగా నిర్వహించిన ప్రీ-రిలీజ్ ప్రెస్ మీట్లో చిత్ర కథానాయిక భూమిక చావ్లా తీవ్ర భావోద్వేగానికి లోనై కన్నీళ్లు పెట్టుకున్నారు. ఈ సినిమా చూసిన తర్వాత కథలోని గాఢత వల్ల తాను రాత్రంతా నిద్రపోలేకపోయానని, ఈ చిత్రం తనను అంతగా వెంటాడిందని ఆమె చెప్పుకొచ్చారు. సమాజంలో జరుగుతున్న కొన్ని సున్నితమైన అంశాలను, పేరెంటింగ్ లోని లోపాలను ఈ సినిమాలో చాలా ధైర్యంగా చూపించారని ఆమె ప్రశంసించారు.
దర్శకుడు గుణశేఖర్ మాట్లాడుతూ.. ‘శాకుంతలం’ వంటి పరాజయం తర్వాత తాను ఎంతో కష్టపడి, బాధ్యతతో ఈ సినిమాను తీశానని తెలిపారు. “ప్రేక్షకుల సమయానికి, డబ్బుకి, విజ్ఞతకి విలువిచ్చి, ఒళ్లు దగ్గర పెట్టుకొని ఈ సినిమాను రూపొందించాను” అని ఆయన వ్యాఖ్యానించారు. కొత్త నటీనటులతో సామాజిక ఇతివృత్తం ఉన్న కథను భారీ టెక్నికల్ వాల్యూస్తో తీయడం ఒక సాహసమేనని, తన మేధస్సుతో కాకుండా ఒక సామాన్య పౌరుడి ఆలోచనా దృక్పథంతో ఈ సినిమాను తెరకెక్కించినట్లు ఆయన వివరించారు.
ఈ చిత్రంలో సారా అర్జున్ ఆత్మ లాంటి పాత్ర పోషించగా, భూమిక చావ్లా వింధ్య వేములపల్లి అనే బలమైన పాత్రలో నటించారు. కాల భైరవ అందించిన సంగీతం, నేపథ్య సంగీతం సినిమాకు ప్రధాన ఆకర్షణగా నిలవనున్నాయని చిత్ర యూనిట్ ధీమా వ్యక్తం చేసింది. యువత, తల్లిదండ్రులు ప్రతి ఒక్కరూ చూడాల్సిన చిత్రమిదని, సోషల్ మీడియా ప్రభావం మరియు కౌమారదశలో పిల్లలు తీసుకునే నిర్ణయాలు ఎలాంటి పరిణామాలకు దారితీస్తాయనేది ఇందులో ప్రధానంగా చూపించినట్లు మేకర్స్ తెలిపారు.
