నటి పూనమ్ కౌర్ ఇటీవల ఒక ఇంటర్వ్యూలో చేసిన వ్యాఖ్యలు టాలీవుడ్ వర్గాల్లో తీవ్ర దుమారాన్ని రేపుతున్నాయి. ఒక ప్రముఖ దర్శకుడు హీరోయిన్ కోసం తన సొంత భార్యను కోమాలోకి వెళ్లేలా కొట్టాడంటూ ఆమె సంచలన ఆరోపణలు చేశారు. ఒక హీరోయిన్ మీద ఉన్న వ్యామోహంతోనే ఆయన ఇలా చేశారని, ఆ దెబ్బలకు ఆమె కోమాలోకి వెళ్లి వారం రోజుల పాటు ఆసుపత్రిలో చికిత్స పొందిందని పూనమ్ వెల్లడించారు. ఈ వార్త ప్రస్తుతం సోషల్ మీడియాలో హాట్ టాపిక్గా మారింది.
ఇంత అన్యాయం జరిగినా, ఆ భార్య తన భర్త పరువు పోకూడదనో లేదా భయంతోనో ఎవరికీ చెప్పకుండా మౌనంగా ఉండిపోయిందని పూనమ్ ఆవేదన వ్యక్తం చేశారు. సదరు హీరోయిన్ కూడా ఏమీ ఎరుగనట్టు సినిమా వేడుకల్లో యధావిధిగా పాల్గొనడం చూసి తాను ఆశ్చర్యపోయానని ఆమె పేర్కొన్నారు. మనుషులు ఇంత దారుణంగా ఎలా ప్రవర్తిస్తారని ఆమె ఈ సందర్భంగా ప్రశ్నించారు. బాధితురాలు అన్యాయం జరిగినప్పటికీ బయటకు రాకపోవడంపై ఆమె విచారం వ్యక్తం చేశారు.
ఈ మొత్తం వ్యవహారంలో పూనమ్ ఆ దర్శకుడి పేరు కానీ, హీరోయిన్ పేరు కానీ నేరుగా ప్రస్తావించలేదు. అయితే గతంలో ఆమె చేసిన వ్యాఖ్యలు, సోషల్ మీడియా పోస్ట్ల ఆధారంగా నెటిజన్లు పలువురు ప్రముఖ దర్శకుల పేర్లను ఊహిస్తూ చర్చలు మొదలుపెట్టారు. కొందరు పూనమ్కు మద్దతుగా నిలుస్తుంటే, మరికొందరు మాత్రం పేర్లు చెప్పకుండా ఇలాంటి ఆరోపణలు చేయడం వల్ల ఇండస్ట్రీలో అనవసరపు గందరగోళం పెరుగుతుందని అభిప్రాయపడుతున్నారు.
